Qarabaşağın bilinməyən təsirləri üzə çıxdı

Qarabaşaq tərkibində lif, bitki mənşəli zülal və antioksidantlarla zəngin olan, qlüten ehtiva etməyən faydalı qida məhsullarından hesab olunur. Mütəxəssislər bildirirlər ki, onun müntəzəm istifadəsi ümumi sağlamlığa müsbət təsir göstərə bilər.

News24.az xəbər verir ki, bu barədə "Verywell Health" nəşri məlumat yayıb.

Məlumata görə, qarabaşaq qan şəkərinin səviyyəsini tarazlaşdırmağa, ürək-damar sağlamlığını dəstəkləməyə və həzmi yaxşılaşdırmağa kömək edir. Tərkibindəki lif və zülal uzun müddət toxluq hissi yaratdığı üçün çəkiyə nəzarətdə də faydalı hesab olunur.

Mütəxəssislər qeyd edirlər ki, qarabaşaq qlüten ehtiva etmədiyindən qlüten həssaslığı olan şəxslər üçün də uyğun seçimdir.

Bununla yanaşı, bəzi insanlarda qarabaşağa qarşı allergik reaksiyalar yarana bilər. Həddindən artıq istehlak isə köp və digər həzm problemlərinə səbəb ola bilər. Şəkərli diabet və yüksək təzyiqdən əziyyət çəkən şəxslərə isə qidalanmalarında dəyişiklik etməzdən əvvəl həkimlə məsləhətləşmək tövsiyə olunur.

Mütəxəssislərin fikrincə, qarabaşağın gündəlik rasiona daxil edilməsi ürək, həzm sistemi və maddələr mübadiləsinin sağlamlığına müsbət təsir göstərə bilər.