Qızartma üçün sağlam yağ növü açıqlandı

Qızartma zamanı istifadə olunan bitki yağının seçimi sağlamlıq baxımından diqqət tələb edir. Diyetoloq və qastroenteroloq Nuriya Dianova yağ alarkən xüsusilə onun yüksək temperatura davamlılığına diqqət yetirməyi tövsiyə edib.

News24.az xəbər verir ki, mütəxəssisin sözlərinə görə, bu baxımdan əsas göstəricilərdən biri yağın tüstülənmə temperaturudur. Bu, yağın yüksək temperaturun təsiri ilə oksidləşməyə başladığı və xüsusiyyətlərinin dəyişdiyi temperatur həddini göstərir.

Dianova qızartma üçün əsasən rafinə edilmiş günəbaxan yağından istifadə etməyi məsləhət görüb. Onun sözlərinə görə, rafinasiya prosesi yağın tərkibindəki bəzi qarışıqları, mumları və fosfolipidləri aradan qaldıraraq tüstülənmə temperaturunun yüksəlməsinə kömək edir.

Diyetoloq qızartma üçün tüstülənmə temperaturu 190 dərəcə və daha yüksək olan rafinə edilmiş yağları daha uyğun hesab edir. Qısa müddətli qızartma üçün isə 170 dərəcədən yuxarı göstəricinin kifayət edə biləcəyini bildirib.

Yağın saxlanma şəraitinə də diqqət yetirmək tövsiyə olunur. Mütəxəssis butulkanın sərin və qaranlıq yerdə, qapağı möhkəm bağlanmış vəziyyətdə saxlanılmasını məsləhət görüb. Bu, yağın işıq və oksigenlə təmas nəticəsində keyfiyyətinin pisləşməsi riskini azaltmağa kömək edə bilər.

Dianova həmçinin istifadə olunmuş yağı yenidən qızdırmamağa çağırıb. Yağın dəfələrlə yüksək temperatura məruz qalmasının arzuolunmaz parçalanma məhsullarının yaranmasına səbəb ola biləcəyini qeyd edib. (demokrat.az)