Su təzyiqi salır? – Mütəxəssislərdən mühüm açıqlama

Kifayət qədər su qəbul etmək arterial təzyiqin normada saxlanmasına və hipertoniya riskinin azalmasına kömək edə bilər.

News24.az xəbər verir ki, bu barədə "Eating Well" nəşri mütəxəssislərə istinadən məlumat yayıb.

Həkimlərin sözlərinə görə, susuzlaşma zamanı qan həcmi azalır və orqanizm bunu kompensasiya etmək üçün qan damarlarını daraldır. Bu isə arterial təzyiqin yüksəlməsinə səbəb ola bilər.

Mütəxəssislər bildirirlər ki, kifayət qədər maye qəbul edildikdə qan dövranı yaxşılaşır, damarlar daha rahat vəziyyətdə qalır və təzyiqin normada saxlanılması asanlaşır.

Doqquz il davam edən araşdırmanın nəticələrinə əsasən, gündə altı və ya daha çox stəkan su içən insanlarda hipertoniya riski gündə bir stəkan və ya daha az su qəbul edənlərlə müqayisədə daha aşağı olub.

Bununla yanaşı, mütəxəssislər qeyd edirlər ki, bəzi hallarda, xüsusilə təzyiq qəfil aşağı düşdükdə, 300-500 millilitr suyun sürətlə içilməsi arterial təzyiqi qısa müddət ərzində artıra bilər. Bu təsir əsasən ortostatik hipotenziyadan əziyyət çəkən insanlarda müşahidə olunur.