Uşaqlarda kitaba marağı necə artırmaq olar? – Psixoloq açıqladı

Uşaqlarda mütaliəyə maraq yaratmaq üçün onları sadəcə oxumağa təşviq etmək kifayət etmir.

News24.az xəbər verir ki, rusiyalı psixoloq Daria Misiyukova kitabın yeni biliklər qazandıran, təxəyyülü inkişaf etdirən və düşünməyə kömək edən bir vasitə olduğunu uşaqlara göstərməyin vacib olduğunu deyib.

Mütəxəssisin sözlərinə görə, mütaliə uşağın gündəlik həyatının təbii bir hissəsinə çevrilməlidir. Bunun üçün uşağa təzyiq göstərmək əvəzinə, kitab oxumağı maraqlı və əyləncəli fəaliyyətə çevirmək tövsiyə olunur.

Psixoloq uşaqlarda kitablara maraq yaratmağın ilk üsulu kimi birlikdə ucadan oxumağı göstərib. Onun fikrincə, bu yanaşma yalnız oxumağı yeni öyrənən uşaqlar üçün deyil, müstəqil şəkildə kitab oxuya bilənlər üçün də faydalıdır. Böyüklərin ifadəli nitqi personajların hisslərini və hadisələrin gedişatını daha yaxşı anlamağa kömək edir. Uşağın hekayəyə marağını artırmaq üçün qısa mətnlər seçmək və ən maraqlı məqamlarda fasilə verərək onu hadisələrin davamını düşünməyə həvəsləndirmək olar.

Digər mühüm məqam uşağın oxuyacağı kitabı özü seçməsinə imkan yaratmaqdır. Bu, bədii əsər, komiks, maarifləndirici kitab və ya qısa hekayələr ola bilər. Psixoloq hesab edir ki, seçim imkanının verilməsi uşağın marağını artırır və onun fikirlərinə hörmət edildiyini hiss etməsinə şərait yaradır.

Mütəxəssis, həmçinin oxunan məzmunun real həyatla əlaqələndirilməsini tövsiyə edib. Məsələn, uşaq heyvanlar haqqında hekayə oxuduqdan sonra həmin canlılar barədə ensiklopediyadan məlumat əldə edə, şəkillərinə baxa və ya onları zooparkda müşahidə edə bilər. Bu üsul uşağın öyrəndiklərini daha yaxşı mənimsəməsinə və kitablardan əldə etdiyi bilikləri gündəlik həyatla əlaqələndirməsinə kömək edir.