Uçuş zamanı ayaqlarınız tutulmasın deyə bunu edin – Sadə məşqlər

Uzun müddət təyyarədə oturmaq ayaqlarda, beldə və omba nahiyəsində ağrı və gərginliyə səbəb ola bilər. Mütəxəssislər uçuşdan əvvəl və təyyarədə edilə biləcək bir neçə sadə hərəkətin bu narahatlığı azaltmağa kömək etdiyini bildirirlər.

News24.az xəbər verir ki, mütəxəssislərin tövsiyə etdiyi hərəkətlərdən biri barmaq uclarında və dabanlarda yeriməkdir. Bunun üçün 10 addımı yalnız barmaq uclarında, daha sonra 10 addımı dabanlarda atmaq və hərəkəti təxminən iki dəqiqə təkrarlamaq məsləhət görülür. Bu, ayaqlarda qan dövranını və əzələlərin aktivliyini artırmağa kömək edir.

Digər faydalı hərəkət isə: arxası üstə uzanaraq ombanı yuxarı qaldırmaq, iki saniyə saxlamaq və yavaşca aşağı endirmək. Mütəxəssislər 15 təkrardan ibarət 3 yanaşma məsləhət görürlər.

Uçuş zamanı isə təxminən saatda bir dəfə ayağa qalxmaq və salonda qısa müddət gəzmək faydalıdır. Oturacaqda olarkən çiyinləri hərəkət etdirmək, ayaq və topuq nahiyəsini yüngül fırlatmaq da bədənin hərəkətliliyini qorumağa kömək edə bilər.

Səfərə bir neçə həftə qalıbsa, mütəxəssislər həftədə 2-3 dəfə məşq etməyi tövsiyə edirlər. Bu zaman ağır çəkilərdən çox düzgün texnikaya diqqət yetirmək vacibdir. Proqrama düzgün icra olunan “deadlift”, baş üzərinə ağırlıq qaldırma, baldır məşqləri və gündəlik 10 min addım daxil edilə bilər.

Bu sadə hazırlıq uzun uçuş zamanı yaranan əzələ gərginliyini azaltmağa və səyahəti daha rahat keçirməyə kömək edə bilər.