Səhhəti ilə bağlı kədərli təfərrüat üzə çıxdı - Foto

Dünyaca məşhur Hollivud ulduzu Brüs Uillisin frontotemporal demensiya (FTD) xəstəliyi ilə mübarizəsi barədə yeni və kədərli təfərrüat ortaya çıxıb.

News24.az xəbər verir ki, 71 yaşlı aktyorun zehni vəziyyətinin getdikcə pisləşdiyi və ünsiyyət qurmaqda ciddi çətinlik çəkdiyi bildirilir.

“Die Hard” və “The Sixth Sense” kimi kult filmlərlə milyonların sevgisini qazanan ulduz 2022-ci ildə afaziya diaqnozu ilə aktyorluq karyerasına son qoyub. Daha sonra ailəsi ona frontotemporal demensiya diaqnozu qoyulduğunu açıqlayıb.

Məlumata görə, xəstəliyin irəliləməsi səbəbindən ailə evinin yaxınlığındakı xüsusi təkmərtəbəli evə köçürülən aktyora sutka ərzində peşəkar qulluq göstərilir. Tibbi sığortanın bu xərcləri, demək olar ki, qarşılamadığı və təkcə aylıq qulluq xərclərinin 30 min ABŞ dollarını keçdiyi bildirilir. Aktyorun təxminən 250 milyon dollar dəyərindəki sərvəti bu ağır və bahalı müalicə prosesinin maliyyələşdirilməsində əsas rol oynayır.

Aktyorun həyat yoldaşı Emma Heminq Uillisin rəhbərliyi ilə idarə olunan mübarizə prosesində məşhur ulduzun ən böyük təsəllisinin dondurma yemək, musiqi dinləmək və maşınla gəzmək olduğu qeyd edilir.

Mənbələr Uillisin vəziyyəti ilə bağlı üzücü təfərrüatı bölüşüblər: “O, həyatının əvvəlki kimi olmadığını hiss edir, lakin vəziyyətin tam olaraq nə qədər ciddi dərəcədə dəyişdiyini dərk edə bilmir. Çox şikayət etmir, sadəcə nəyinsə düz olmadığını anlayır”.

Sənətdən uzaqlaşdıqdan sonra aktyorun ətrafındakı dairənin daraldığı da iddialar arasındadır. Keçmişdə onunla sıx ünsiyyətdə olan bir çox Hollivud simasının artıq onunla maraqlanmadığı qeyd edilir. /qafqazinfo