Tramp seçkilərdə Paşinyanı dəstəklədi

“Nikol Paşinyanın 7 iyun 2026-cı il tarixində yenidən seçilməsi üçün ona tam və qeyd-şərtsiz dəstəyimi verirəm”.

News24.az xəbər verir ki, bu sözləri ABŞ prezidenti Donald Tramp “Truth Social” sosial şəbəkəsində yazıb.

“Ermənistanın baş naziri, möhtəşəm dost və lider olan Nikol Paşinyan öz ölkəsini güclü, varlı və çox təhlükəsiz edir! Nikol Ermənistan və bütün Cənubi Qafqaz regionu üçün sülh və rifah barədə mənim baxışlarımı tam şəkildə bölüşür. Dövlət katibimiz Marco Rubio yenicə Ermənistana səfər edib və orada hər iki ölkə üçün bir sıra mühüm razılaşmalarda irəliləyiş əldə olunub”, - deyə ABŞ lideri bildirib.

D.Tramp tezliklə ABŞ və Ermənistanın birlikdə Beynəlxalq Sülh və Rifah üçün “Tramp Marşrutu”nun təməlini qoyacağını açıqlayıb: “Bu layihə Cənubi Qafqazı dəyişdirəcək və möhtəşəm Amerika enerji şirkətlərinin Mərkəzi Asiyadan ABŞ-yə qədər çıxış əldə etməsinə kömək edəcək”.

“Məhz bu səbəblərə görə Nikol Paşinyanın 7 iyun 2026-cı il tarixində yenidən seçilməsi üçün ona tam və qeyd-şərtsiz dəstəyimi verirəm. Nikolun köməyi ilə biz ABŞ-ni, Ermənistanı, Cənubi Qafqazı və Mərkəzi Asiyanı tarixdə görünməmiş zirvələrə yüksəldəcəyik”.