31-ci Beynəlxalq İnformatika Olimpiadasının bağlanış mərasimi keçirildi
    • 10-08-2019, 17:24
    • 757

31-ci Beynəlxalq İnformatika Olimpiadasının bağlanış mərasimi keçirildi

Bu gün Heydər Əliyev Mərkəzində 31-ci Beynəlxalq İnformatika Olimpiadasının (IOI) bağlanış mərasimi keçirilib. News24.az -ın xəbərinə görə, bağlanış mərasimində Təhsil naziri Ceyhun Bayramov, Nəqliyyat, Rabitə və Yüksək Texnologiyalar naziri Ramin Quluzadə, xarici ölkə səfirləri və digər rəsmi qonaqlar iştirak ediblər.
Əvvəlcə cari ilin fevral ayında məktəblilərin 31-ci Beynəlxalq İnformatika Olimpiadasının (IOI 2019) yerli və beynəlxalq təşkilat komitələrinin Bakıya gəlişinə həsr olunmuş qısa videoçarx nümayiş olunub.
Təhsil naziri, “IOI 2019”-un sədri Ceyhun Bayramov olimpiadanın başa çatması münasibətilə iştirakçıları təbrik edib, yarışın yüksək səviyyədə təşkil olunması ilə bağlı təşkilatçılara, qlobal sponsor “Acer” şirkətinə və əməyi keçən digər şəxslərə təşəkkürünü bildirib.
İKT bilik və bacarıqlara yiyələnmənin vacibliyini diqqətə çatdıran Təhsil naziri ölkəmizin təhsil sahəsində informasiya-kommunikasiya texnologiyalarının geniş şəkildə tətbiqindən söz açıb.
Nazir çıxışının sonunda olimpiada qaliblərini təbrik edib: "Hər bir gənc dünyanı dəyişmək və daha yaxşı etmək imkanına malikdir. Əminəm ki, Azərbaycan mədəniyyəti, musiqi və mətbəxi ilə tanışlıq imkanı əldə etdiniz. Ölkəmizdə multikulturalizm hökm sürür. İOİ- 2019 İT sənayesinin inkişafına töhfə olacaq". 
Nazirlik olaraq da informasiya texnologiyalarının tədrisinə önəm veririk".
Tədbirdə olimpiadanın bürünc, gümüş və qızıl medala layiq görülmüş iştirakçıları mükafatlandırılıb. Ən yüksək nəticə göstərmiş iştirakçıya qızıl medalla yanaşı xüsusi mükafat da təqdim edilib.
IOI prezidenti Qreq Li beynəlxalq olimpiadanın bağlanış bəyannaməsini diqqətə çatdırıb.
Bağlanış mərasimində iştirakçıların mükafatlandırılması ilə yanaşı, növbəti ildə yarışın Sinqapurda keçiriləcəyi elan edilib. Təhsil nazirinin müavini Firudin Qurbanov və “IOI 2019”-un fəxri həmsədri, ADA Universitetinin rektoru Hafiz Paşayev tərəfindən Beynəlxalq İnformatika Olimpiadasının bayrağı Sinqapur Milli Universitetinin professoru Tan Sun Tekə təqdim olunub.
Daha sonra ölkəmiz haqqında qısa film nümayiş edilib.
Tədbir bədii hissə ilə davam etdirilib.
Qeyd edək ki, ölkəmizdə ilk dəfə keçirilən Beynəlxalq İnformatika Olimpiadasında Azərbaycan komandası da daxil olmaqla, 88 ölkə və regiondan 600-dən çox şagird, müəllim və ekspertdən ibarət rəsmi nümayəndə heyətləri iştirak edirdilər.
Olimpiada Təhsil Nazirliyinin təşəbbüsü, ADA Universiteti, Nəqliyyat, Rabitə və Yüksək Texnologiyalar Nazirliyi və digər dövlət qurumlarının dəstəyi ilə keçirilib. Olimpiadanın rəsmi qlobal sponsoru “Acer” şirkətidir. Bundan başqa, “Azercell Telekom” tədbirin “İstedadların Rəqəmsal Sponsoru”, “PAŞA Bank” isə “İstedad sponsoru” kimi dəstək verib.
Bilik yarışmasının media tərəfdaşı İctimai Televiziyadır (İTV).

Afaq Mirayiq