Bakıda keçirilən Dünya Kuboku rekordlarla yadda qaldı

Azərbaycan Üzgüçülük Federasiyasının (ASF) təşkilatçılığı, Gənclər və İdman Nazirliyinin (GİN) dəstəyi ilə Su İdmanı Sarayında təşkil olunan Dünya Kubokunun ikinci gününün final seansı tarixi anlarla yadda qalıb.

ASF-dən News25.az-a verilən məlumata görə, növbəti yarış günündə 10 kateqoriya üzrə final yarışları keçirilib.

Günün əsas hadisəsinə Yeqor Kornev imza atıb. Rusiya təmsilçisi 100 metr məsafəyə sərbəst üsulla yarışda 44,84 saniyəlik göstərici ilə dünya rekordçusu Kayl Çalmersin nəticəsinə ortaq olub.

Kornev bununla yanaşı, 50 metr məsafəyə arxası üstə üsulu ilə yarışda 22,23 saniyəlik göstərici ilə Dünya Kubokunun rekordunu yeniləyib.

Azərbaycan təmsilçilərindən Fatimə Alkərəmova həlledici mərhələdə çıxış edib. O, 400 metr məsafəyə qarışıq üsulla yarışda qüvvəsini sınayıb və 7-ci olub.

İkinci günün final seansının nəticələri:

Kişilər

Arxası üstə üsulla 50 metr – 1. Yeqor Kornev, 2. Pavel Samusenko, 3. Piter Kutsi

Qarışıq üsulla 200 metr – 1. Luk Barr 2. Alberto Rassetti 3. Finley Noks

Brass üsulu ilə 50 metr – 1. Hayyanq Çin 2. Maykl Huli 3. Kirill Priqoda

Sərbəst üsulla 100 metr – 1. Yeqor Kornev 2. Kemeron Makevoy 3. Vasili Kukuşkin

Kəpənək üsulu ilə 200 metr – 1. Cuner Çen 2. So Oqata 3. Alberto Rassetti

Qadınlar

Qarışıq üsulla 400 metr – 1. Yitinq Yu, 2. Ebi Vud, 3. Mohan Çanq

Sərbəst üsulla 200 metr – 1. Şivon Hohey 2. Anna Peplovski 3. Yaqi Fan

Arxası üstə üsulla 100 metr – 1. Marit Stenberxen 2. Teylor Rak 3. Anna Peplovski

Kəpənək üsulu ilə 50 metr – 1. Ros Vanotterdayk 2. Sara Yunevik 3. Arina Surkova