Uşaq Evində mədəni-əyləncəli proqram təşkil olunub - FOTOLAR

Bakı Şəhər Mədəniyyət Baş İdarəsi və "Liatris Holdinq"in birgə təşkilatçılığı ilə 1 saylı Uşaq evi sosial xidmət müəssisəsində uşaqlar üçün mədəni-əyləncəli proqram təşkil olunub.

News24.az xəbər verir ki, tədbir çərçivəsində uşaqlara Şarl Perronun məşhur "Qırmızı Papaq" nağılı əsasında hazırlanmış kukla tamaşası nümayiş etdirilib. Daha sonra uşaqlar şeirlər səsləndirib, mahnılar ifa ediblər. Konsert proqramında Əməkdar artist, tanınmış skripka ifaçısı Səlim Abbasovun çıxışı da uşaqlar tərəfindən böyük maraqla qarşılanıb. Bədii hissənin ardından uşaqlar üçün xüsusi nahar süfrəsi açılıb.

1 saylı Uşaq evi sosial xidmət müəssisəsinin direktor müavini Rövşən Məmmədov tədbir təşkilatçılarına minnətdarlığını bildirib:

"Yay tətilində uşaqlarımız üçün belə rəngarəng və unudulmaz proqram təşkil etdiklərinə görə "Liatris Holdinq"in rəhbəri Ruhiyyə Əliyevaya və əməyi keçən hər kəsə dərin minnətdarlığımızı bildiririk. Balalarımız həm şən vaxt keçirdilər, həm də mənəvi baxımdan zəngin bir gün yaşadılar. Qayğıya ehtiyacı olan uşaqlara göstərilən bu diqqət və səmimi münasibət bizim üçün son dərəcə dəyərlidir."

Təşkilatçılar qeyd ediblər ki, bu cür sosial layihələrin əsas məqsədi qayğıya ehtiyacı olan uşaqlara diqqət və sevgi göstərmək, onların asudə vaxtını səmərəli təşkil etmək, həmçinin cəmiyyətin həssas təbəqəsinə mənəvi dəstək olmaqdır.