Göygöldə polisi söyən şəxslər həbs edildi

Göygöl rayonunda polis əməkdaşlarını təhqir edən iki nəfər saxlanılıb.

News24.az -ın əldə etdiyi məlumata görə, Tovuzun Vahidli kənd sakini olan 1994-cü il təvəllüdlü S.M və iş yoldaşı martın 8-də Göygölə gediblər.

Onlar “Sultan” şadlıq evinin qarşısında *PS** dövlət qeydiyyat seriyalı avtomobillə hərəkətdə olarkən Göygöl şəhəri ərazisində post-patrul xidməti aparan polis avtomobilinə işarə ediblər. İşarədən sonra polislər həmin şəxslərə yaxınlaşıb və Tovuz rayonundan Göygölə gələn şəxslər onlardan “Əminə market”in yerini soruşub. Bundan sonra polislər uzaqlaşmaq istəyərkən S.M onların arxasınca təhqiramiz ifadələr işlədib. Bunu eşidən polis əməkdaşları geri qayıdıb və mübahisə böyüyüb.

Əraziyə digər polislərin də gəlməsi ilə sərxoş halda olan 2 nəfər saxlanılıb. Göygöl rayon Polis Şöbəsinə aparılan şəxslərin barəsində İnzibati Xətalar Məcəlləsinin 535-ci maddəsi ilə protokol tərtib edilib.

Saxlanılan şəxslər daha snra rotokolla birgə Göygöl rayon Məhkəməsinə göndərilib.

Məhkəmənin qərarı ilə onlara 8 sutka inzibati həbs cəzası verilib.

Taleh BAĞIROV