Jalə Əhmədova: "Jurnalistlərimizə hücum edənlər cəzalandırılmalıdır"

Söz və fikir azadlığının carçılarından biri olan və özünü demokratiyanın beşiyi adlandıran Fransada jurnalistlərimizə hücum edilib. Hücum zamanı AzTV əməkdaşlarına bədən xəsarətləri yetirilməsi, çəkiliş kamerasının sındırılması, ən əsası da kameranı geri tələb edərkən jurnalistlərimizin silahla hədələnməsi birbaşa cinayət əməlidir və bu cinayəti törədənlər məsuliyyətə cəlb olunmalıdır. 

Bunu ​News24.az​​​-a Milli Məclisin deputatı Jalə Əhmədova AzTV əməkdaşlarının Fransada hücuma məruz qalması haqda danışarkən bildirib.

J.Əhmədova qeyd edib ki, bu hadisə yalnız Azərbaycan jurnalistlərinə deyil, ümumilikdə beynəlxalq media azadlığına kobud müdaxilə və  jurnalistlərin qanuni peşə fəaliyyətinə mane olmaq deməkdir:

"Jurnalistlərə qarşı törədilən bu vandal hücumu qətiyyətlə pisləyir, cinayətin qısa müddət ərzində Fransa hüquq-mühafizə orqanları tərəfindən araşdırılmasını və cinayətkarların müəyyən edilərək cəzalandırılmasını tələb edirik".