İntim videoları yayılan FHN polkovnikin şikayəti rədd edildi - VİDEO

Bakı Apellyasiya Məhkəməsində intim videoları çəkib yaymaqda təqsirli bilinən Fövqəladə Hallar Nazirliyinin polkovniki Zaur Mirzəyevin Bakı AğırCinayətlər Məhkəməsinin hökmündən verilən şikayətinə baxılıb. 

News24.az-ın məlumatına görə, prosesdə təqsirləndirilən və zərərçəkmiş tərəfin şikayətləri dinlənilib.

Z.Mirzəyev əməlində cinayət tərkibi olmadığını əsas gətirərək hökmün ləğv edilməsini xahiş edib. Polkovniklə eyni videoda yer alan, zərərçəkmiş kimi tanınmış qadınlardan biri isə əksinə cəzanın ağırlaşdırılmasını həmçinin dəymiş mənəvi ziyanana görə 192 min manat təzminat ödənilməsini istəyib. 

Birinci instansiya məhkəməsi təqsirləndirilən şəxsdən 4 min manat alınaraq zərərçəkmişə ödənilməsini uyğun bilib. 

Hakim Fərid Əyyubovun sədrlik etdiyi hakimlər heyəti şikayətlərin heç birini əsaslı hesab etməyib.

Qərara əsasən birinci instansiya məhkəməsinin hökmü dəyişdirilmədən qüvvədə saxlanılıb.

Qeyd edək ki, Zaur Mirzəyev ötən ilin avqustunda həbs edilib. O, Cinayət Məcəlləsinin 156.2.1 (şəxsi həyatın toxunulmazlığını pozma), 242 (pornoqrafik materialları və ya əşyaları qanunsuz yayma) və 309.2-ci (vəzifə səlahiyyətlərini aşma) maddələri ilə ittiham olunub. 

İttihama görə, Z.Mirzəyev xidməti kompüterinə xüsusi proqram vasitəsilə gizli kamera quraşdıraraq qadınlarla 2013-cü ildən başlamaqla 2019-cu ilin sonlarınadək iş otağında intim münasibətdə olarkən video və foto çəkilişlər aparıb. Hazırlanmış qanunsuz pornoqrafik materialların 2022-ci ilin avqust ayında internet şəbəkələrində yayılmasına səbəb olub.

Bakı Ağır Cinayətlər Məhkəməsinin hökmü ilə Z. Mirzəyev 3 il 6 ay azadlıqdan məhrum edilib. Zərərçəkmiş şəxs tərəfindən qaldırılan 192 minlik mülki iddianın 4 min manatı təmin edilib.

Samir Əli