Ceyhun Bayramov tacikistanlı həmkarı ilə bu məsələləri MÜZAKİRƏ ETDİ

Azərbaycan və Tacikistan arasında ikitərəfli əməkdaşlıq gündəliyinin aktual məsələləri, çoxtərəfli platformalarda əməkdaşlıq, habelə regional məsələlər müzakirə edilib.

Bu barədə News24.az-a Xarici İşlər Nazirliyindən məlumat verilib.

Belə ki, Azərbaycan xarici işlər naziri Ceyhun Bayramov İqtisadi Əməkdaşlıq Təşkilatının (İƏT) xarici işlər nazirlərinin Şuşada keçiriləcək 27-ci İclasında iştirak məqsədilə Azərbaycanda səfərdə olan Tacikistanın xarici işlər naziri Sirojiddin Muhriddin ilə görüşüb.

Azərbaycan və Tacikistan arasında mövcud olan dostluq münasibətlərindən söz açan nazir C.Bayramov bu münasibətlərin inkişafında qarşılıqlı səfərlərin rolunu xüsusilə vurğulayıb və ölkəmizin başçısı, Azərbaycan Respublikasının Prezidenti cənab İlham Əliyevin iştirak etdiyi Mərkəzi Asiya Dövlət Başçılarının 5-ci Məşvərət görüşünü məmnunluqla qeyd edib.

Azərbaycan və Tacikistan arasında geniş investisiya potensialının mövcud olduğunu bildirən C.Bayramov bu xüsusda ölkələrimiz arasında nəqliyyat və logistika sahəsində əməkdaşlığın inkişaf potensialının olduğunu söyləyib. Bakı–Düşənbə birbaşa təyyarə reyslərinin bu, habelə turizm sahəsində ölkələr arasında əlaqələrin güclənməsində böyük rol oynadığı vurğulanıb.

Bölgədə mövcud vəziyyət barədə həmkarına məlumat verən C.Bayramov erməni silahlı qüvvələrinin növbəti təxribatlarına cavab olaraq həyata keçirilmiş lokal antiterror tədbirləri və bu tədbirləri şərtləndirən səbəblər barədə söz açıb. Sözügedən tədbirlərin müvafiq beynəlxalq normalara tam riayət olunmaqla keçirildiyi, habelə bu faktın müxtəlif beynəlxalq təşkilatlar tərəfindən təsdiq edildiyi vurğulanıb. Azərbaycanın yerli erməni sakinlərinin reinteqrasiyası səyləri barədə danışan nazir bu xüsusda Azərbaycan tərəfindən müvafiq tədbirlər görüldüyünü qeyd edib.

Tacikistan xarici işlər naziri S.Muhriddin öz növbəsində Azərbaycan tərəfinə qonaqpərvər qarşılamaya görə minnətdarlığını bildirib və Azərbaycan–Tacikistan qardaşlıq əlaqələrinin həm ikitərəfli, həm də çoxtərəfli müstəvidə uğurla inkişaf etdiyini, iki ölkə arasında logistika, nəqliyyat, turizm və digər sahələrdə geniş əməkdaşlıq potensialının mövcud olduğunu diqqətə çatdırıb.

Görüş zamanı qarşılıqlı maraq doğuran digər məsələlər müzakirə edilib.