Aİ bu ölkə ilə razılığa gələ bilmədi

Avstraliyanın ticarət naziri Don Farrell bildirib ki, Avstraliya və Aİ ticarət sazişi üzərində razılığa gələ bilməyiblər.

News24.az xəbər verir ki, Farrell, Kanberra və Brüssel arasında qeyri-rəsmi müzakirələrdən sonra videomüraciətində “Təəssüf ki, biz irəliləyiş əldə edə bilmədik” deyib.

“Danışıqlar davam edəcək və ümid edirəm ki, biz həm Avstraliyaya, həm də avropalı dostlarımıza xeyir verəcək bir müqavilə imzalayacağıq”, - o qeyd edib.

Yaponiyada G7 ticarət nazirlərinin görüşü çərçivəsində keçirilən danışıqlar hər iki tərəfin qalan fikir ayrılıqlarını aradan qaldırmaq üçün son cəhdi kimi qiymətləndirilib.

“Avropa Komissiyası Osaka danışıqlarında irəliləyişin olmamasından təəssüflənir. Danışıq qruplarımız son həftələrdə, o cümlədən Osaka görüşündən əvvəlki günlərdə yaxşı irəliləyiş əldə ediblər. Razılaşmanın əldə olunmağa yaxın olduğuna dair nikbinlik var idi. Lakin Osakada nazirlərin müzakirələri eyni irəliləyişə nail olmayıb. Avstraliya tərəfi kənd təsərrüfatı tələblərini yenidən təqdim edib. Avropa Komissiyası danışıqları davam etdirməyə hazırdır”, - Avropa Komissiyasının sözçüsü bildirib.

Mal əti, şəkər və quzu əti üçün böyük Avropa bazarına çıxışın yaxşılaşdırılması Avstraliyanın iri kənd təsərrüfatı sektoru üçün vacib şərtdir. Brüssel üçün bu saziş Avstraliyanın strateji faydalı qazıntıların böyük ehtiyatlarına daha yaxşı çıxışı təmin edəcək.

Akqabay