Cəlilabadda 17 yaşlı qız qaçırıldı - MƏHKƏMƏ İŞİ

Şirvan Apellyasiya Məhkəməsində adam oğurluğunda təqsirləndirilən Cəlilabad şəhər sakini, 1993-cü il təvəllüdlü A.S. (ad, soyadı şərti) və dayısı oğlu, 1994-cü il təvəllüdlü H.M.-nin (ad, soyadı şərti) barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası başa çatıb. 

News24.az Pravda.az-a istinadla bildirir ki, hakim Elşad Əliyevin sədrliyi ilə keçirilən prosesdə qərar elan olunub. 

Qərara əsasən, apellyasiya protesti təmin edilib, Lənkəran Ağır Cinayətlər Məhkəməsinin H.M.-ya aid hissədə dəyişdirilib. Belə ki, onun Sabunçu Rayon Məhkəməsinin 26 oktyabr 2023-cü il tarixli ilə təyin olunmuş 1 il 3 ay müddətinə azadlıqdan məhrumetmə cəzası Lənkəran Ağır Cinayətlər Məhkəməsinin 07 noyabr 2023-cü il tarixli hökmü ilə təyin olunmuş 10 il müddətinə azadlıqdan məhrumetmə cəzası ilə qismən toplanıb və H.M.-ya cinayətlərin məcmusu üzrə qəti olaraq 10 il 6 ay müddətinə azadlıqdan məhrumetmə cəzası təyin edilib. 

Qeyd: Həmin şəxslər Cinayət Məcəlləsinin 144.3-cü (yetkinlik yaşına çatmayan şəxsi oğurlama) maddəsi ilə təqsirləndiriliblər. Araşdırmalar zamanı məlum olub ki, A.S. dayısı oğlu ilə əvvəlcədən plan qurub. Onlar H.M.-nin atasına məxsus “VAZ” markalı avtomobillə A.S.-nin qonşuluğunda yaşayan 17 yaşlı qızı izləyiblər. Qız dərsdən çıxıb yaşadığı evə gedərkən qəfil yaxınlaşaraq onu zorla avtomobilə əyləşdiriblər.

Bundan sonra A.S. evlənmək məqsədilə qaçırdığı qızı dayısının evinə aparıb. Bir qədər sonra ora polislər gəlib və qızı ailəsinə qaytarıblar. A.S. isə 3 gün müddətində çayın kənarında gizlənsə də, sonradan polisə təslim olub. Məhkəmədə zərərçəkmiş şəxs qismində çıxış edən qaçırılan qız A.S.-dən şikayətçi olduğunu deyib. O, A.S.-nin dayısı oğlunu əvvəldən tanımadığını deyib və ona qarşı şikayətinin olmadığını bildirib.

Lənkəran Ağır Cinayətlər Məhkəməsinin hökmü ilə A.S.-yə 10 il 6 ay, H.M.-yə isə 10 il həbs cəzası verilib.