![Qarabağ canilərinin məhkəməsi başlayır-onları hansı cəza gözləyir?](/uploads/posts/2024-09/3c619486f7bb7b0375f2abb5f62fb066.webp)
-
- Bu gün, 16:15
- 106
Qarabağ canilərinin məhkəməsi başlayır-onları hansı cəza gözləyir?
Xəbər verdiyimiz kimi, Azərbaycanın baş prokuroru Qarabağdakı separatçı rejimin cinayətkar hərbi-siyasi liderlərinə qarşı ibtidai istintaqın başa çatdığını açıqlayıb.
News24.az Musavat.com-a istinadla xəbər verir ki, Rusiyada keçirilən Şərq İqtisadi Forumuna qatılan Azərbaycanın baş prokuroru Kamran Əliyev bu barədə News.ru-ya açıqlama verib. Onun sözlərinə görə, yaxın vaxtlarda işlər məhkəməyə veriləcək.
Siyasi və Hüquqi Araşdırmalar Mərkəzinin sədri, hüquqşünas Xəyal Bəşirov Musavat.com-a bildirib ki, iş çox mürəkkəbdir, zərərçəkmiş şəxslər çoxdur. Ekspert qeyd edib ki, məsələnin həm siyasi, həm də hüquqi nəticələri var: “Azərbaycan ilk dəfə terrorçuları beynəlxalq tribunalların, hüquq ictimaiyyətinin mühakimə etməli olduğu şəxsləri özü mühakimə edəcək. Xocalı faciəsində iştirak edən Vaqif Xaçatryan 15 il azadlıqdan məhrumetmə cəzası aldı. Onu da qeyd etmək lazımdır ki, qanunsuz separatçı xuntanın “prezidentləri”, “nazirləri” və digərləri ilə Ruben Vardanyanın cinayətləri arasında fərqliliklər var. R.Vardanyan Azərbaycan Respublikasının sərhədlərini qanunsuz pozub, terrorçu qruplaşmaların maliyyələşdirilməsində, eyni zamanda qanunla qadağan edilmiş silahlı qruplaşmaların yaradılmasında iştirak edib. Digər şəxslər isə sülh və insanlıq əleyhinə cinayətlər, terror, soyqırım, təcavüz, müharibə cinayətlərində ittiham olunurlar. Azərbaycan cinayət qanunvericilində ən ağır maddələr sülh və insanlıq əleyhinə və müharibə cinayətləridir. Bu cinayətlərin sanksiyalarında ömürlük azadlıqdan məhrumetmə cəzaları nəzərdə tutulub. Düşünürəm ki, sözügedən şəxslərin törətdikləri cinayətlərin dərəcəsi, törədilən cinayətlərin obyekti olan şəxslərin əhatə dairəsi genişdir. Bu cinayətkarlar çox sayda insanın ölümə səbəb olublar- Xocalı, Başlıbel, Daşaltı faciələrinin törədilməsində iştirak ediblər”.
Xəyal Bəşirov: "Bu cür şəxslərlə dövlətin idarə edilməsi həqiqətən də təhlükəlidir" » Newscenter.az
X.Bəşirov vurğulayıb ki, İkinci Qarabağ müharibəsi dövründə də onlar bu addımı atıblar, müharibə cinayətləri törədiblər. Arutyunyan özü də etiraf etmişdi ki, Azərbaycan şəhərlərinin bombalanması əmrini şəxsən verib. Bunu nəzərə alaraq düşünürəm ki, onlar barəsində verilən ittihamlar çərçivəsində ədalətli qərar ömürlük azadlıqdan məhrumetmə cəzası olmalıdır.
R.Vardanyanla bağlı maddələrdə də, qanunla qadağan edilmiş silahlı birləşmələri yaratmaq və yaxud onların işində iştirak etmək cinayətinə görə ömürlük azadlıqdan məhrumetmə cəzası nəzərdə tutulur. İbtidai istintaq mərhələsində aparılan əhatəli araşdırmada R.Vardanyanın iştirak etdiyi, yaxud törədilən cinayətlərin insanların ölümünə səbəb olduğu müəyyən ediləcək. Vardanyanın törətdiyi cinayətlərin ağırlıq dərəcəsinə görə onun barəsində də ömürlük azadlıqdan məhrumetmə cəzası nəzərdə tutula bilər. Hər bir halda Azərbaycan öz ərazilərindəki boz zonaya son qoydu. Sözügedən şəxslərin hər biri terrorçuluqla məşğul olub, terroru maliyyələşdiriblər, Azərbaycan ərazisinə qanunsuz daxil olublar, qanunla qadağan edilmiş silahlı birləşmələrin yaradılmasını həyata keçirib, onların törətdiyi cinayətlərdə iştirak ediblər və çox sayda insanın ölümünə səbəb olublar. Yəni, onlar çox ağır cinayətlər törədiblər. Yeri gəlmişkən, 137 dövlətin təsdiq etdiyi Roma statutunun mahiyyəti 4 cinayət üzərində qurulub-soyqırımı, təcavüz, sülh və insanlıq əleyhinə olan cinayətlər və müharibə cinayətləri. Bu şəxslər bizə qarşı bütün bu cinayətləri törədiblər. Fikrimcə, onlar barəsində ədalətli qərar veriləcək. Azərbaycan bu şəxslərin mühakiməsi prosesi ilə növbəti dəfə dünyaya və beynəlxalq ictimaiyyətə nümunə nümayiş etdirəcək”.
Qeyd edək ki, qanunsuz separatçı xuntanın üç keçmiş “prezidenti”- Arkadi Qukasyan, Bako Saakyan və Arayik Arutyunyan, “parlamentin spikeri” David İşxanyan, keçmiş “xarici işlər naziri” David Babayan, “müdafiə ordusunun keçmiş komandanı” Levon Mnatsakanyan, keçmiş “dövlət naziri” Ruben Vardanyan və ordunun keçmiş “baş qərargah rəisi” David Manukyan artıq bir ilə yaxındır ki, Azərbaycanda həbsdədir. Azərbaycanın Baş Prokurorluğu tərəfindən 15 separatçıya qarşı cinayət işi başlanıb və onlar beynəlxalq axtarışa veriliblər. 2023-cü ilin sentyabrında keçirilən əməliyyatdan sonra onlar saxlanılaraq Bakıya gətirilib və istintaqa təhvil veriliblər. Onlara qarşı terrorizm, terrorçuluğu maliyyələşdirmə, qanunla nəzərdə tutulmayan silahlı birləşmə və qruplaşmalar yaratmaq, terrorizm məqsədilə təlimlər keçirmək ittihamları irəli sürülüb.
Bu ilin iyununda Bakı onların işi üzrə istintaqın başa çatdığını elan edib.