Xaçmazda göbələkdən zəhərlənən ikinci qadın da öldü – YENİLƏNİB

Xaçmazda meşədən göbələk yığıb yedikdən sonra zəhərlənən rəfiqələrdən digəri də öldü.

News24.az Shimal.News-a istinadla bildirir ki, 47 yaşlı İ.Bayramova Bakı Kliniki Tibbi Mərkəzə çatdırılan zaman yolda vəfat edib. Onun rəfiqəsi Günel Abdullayeva isə həkimlərin səyinə baxmayaraq xəstəxanada vəfat edib.

Tibbi Ərazi Bölmələrini İdarəetmə Birliyi (TƏBİB) məlumatı təsdiqləyib. Bildirilib ki, 39 yaşlı G.Abdullayeva kəskin ağır və ekzotoksiki şok vəziyyətində Kliniki Tibbi Mərkəzin Toksikologiya şöbəsinə çatdırılıb. Bütün reanimasiyon tədbirlərin aparılmasına və həkimlərin çoxsaylı səylərinə baxmayaraq, onun həyatını xilas etmək mümkün olmayıb.

Qeyd edək ki, vəfat edən qadınlar Bakı şəhəri Xətai rayonunun sakinləri olublar. Onlar Seyidli kəndində bağ evlərinə gələrək göbələk yığımı ilə məşğul olublar.

Faktla bağlı araşdırma aparılır.

09:50

Xaçmazda rəfiqələr meşədə göbələk yedikdən sonra zəhərlənib. Nəticədə onlardan biri dünyasını dəyişib.

Qafqazinfo-nun məlumatına görə, hadisə rayonun Seyidli kəndində baş verib.

İlahə Bayramova və rəfiqəsi Günel Abdullayeva Xaçmazda qonaq olarkən meşə sahəsində topladıqları göbələkdən yeyiblər. Daha sonra onlar zəhərlənmə diaqnozu ilə Xaçmaz Rayon Mərkəzi Xəstəxanasına müraciət ediblər.

Qadınlar oradan Bakıdakı Kliniki Tibbi Mərkəzə göndərilərkən 47 yaşlı İ.Bayramova yolda vəfat edib.

Faktla bağlı araşdırma aparılır.