Dövlət Gömrük Komitəsindən çıxarılan vəzifəli şəxsə CİNAYƏT İŞİ AÇILDI

Bir neçə ay əvvəl Dövlət Gömrük Komitəsindəki işindən uzaqlaşdırılan şəxsə cinayət işi açılıb.

News24.az-ın məlumatına görə, Komitənin keçmiş əməkdaşı Şeyxov Duman Hüseyn oğlu barəsində Azərbaycan Respublikasının Cinayət Məcəlləsinin 309.1-ci, yəni,vəzifə səlahiyyətlərini aşma maddəsi ilə iş açılıb. Artıq cinayət işinin ibtidai istintaqı yekunlaşdırılıb.

Qeyd edək ki, Dövlət Gömrük Komitəsindən verilən məlumata görə, 28 iyun 2019-cu il tarixdə "İrşad Trade 2018" MMC-nin ünvanına konteynerlə daxil olmuş velosiped yüklərinin gömrük yoxlanmasını növbəti günə keçirməmək və tezləşdirmək müqabilində Dövlət Gömrük Komitəsi Baş Gömrük Mühafizə Xidmətinin böyük mühafizəçisi, gömrük xidməti mayoru Şeyxov Duman Hüseyn oğlunun qeyri-qanuni olaraq şirkət nümayəndəsindən 400 manat pul alması barədə Dövlət Gömrük Komitəsinin Əməliyyat-İstintaq Baş İdarəsinə məlumat daxil olub.

Dərhal Komitənin Əməliyyat-İstintaq Baş İdarəsinin əməkdaşları tərəfindən keçirilən əməliyyat tədbirləri nəticəsində Baş Gömrük Mühafizə Xidmətinin böyük mühafizəçisi Duman Şeyxov saxlanılıb və faktla bağlı qanunvericiliyə uyğun olaraq araşdırma aparılıb. Aparılan araşdırmaların və gömrük əməkdaşının dindirilməsinin nəticəsi olaraq o, Bakı şəhəri, Qaradağ rayonu ərazisində yerləşən "Sədərək" ticarət mərkəzində qeyd olunan yüklərin boşaldılması və gömrük yoxlamasının tezləşdirilməsi müqabilində qeyri-qanuni 400 manat aldığını etiraf edib. Bundan sonra D.Şeyxov şalvarının sol cibində olan 4 ədəd 100-lük manat nominalında pul əskinaslarını könüllü olaraq təqdim edib.

Azərbaycan Respublikası Dövlət Gömrük Komitəsi sədrinin müvafiq əmri ilə Baş Gömrük Mühafizə Xidmətinin böyük mühafizəçisi, gömrük xidməti mayoru Şeyxov Duman Hüseyn oğlu "Gömrük orqanlarında xidmət haqqında" Əsasnamənin 50-ci maddəsinə əsasən, tutduğu vəzifədən azad edilərək Komitənin sərəncamına götürülüb.