Ərdoğan: "Azərbaycan üçtərəfli bəyanatın müddəalarına tam əməl edir"

Türkiyə Prezidenti Rəcəb Tayyib Ərdoğan Azərbaycanın Rusiya sülhməramlılarının müvəqqəti yerləşdirildiyi Qarabağ bölgəsində qanunsuz erməni silahlı dəstələrinin törətdiyi təxribatlara münasibət bildirib.

News24.az xəbər verir ki, dövlət başçısı Özbəkistandan səfərdən qayıdarkən jurnalistlərin bununla bağlı suallarını cavablandırıb.

O bildirib ki, Azərbaycan üçtərəfli bəyanatın müddəalarına tam əməl edir: "Ona görə də Azərbaycan tərəfindən heç bir pozuntu yoxdur. Orada Azərbaycana qarşı hücum gerçəkləşib deyə müdafiə reaksiyası olub. Əsas odur ki, üçtərəfli bəyanatın müddəalarına uyğun olaraq erməni silahlı ünsürlərinin Azərbaycanın beynəlxalq səviyyədə tanınmış ərazilərindən tamamilə çıxarılması təmin edilsin".