Əlillər üçün 500 yeni iş yeri yaradılacaq

Əmək və Əhalinin Sosial Müdafiəsi Nazirliyi və BMT-nin İnkişaf Proqramı (BMTİP) Azərbaycanda inkluziv iqtisadi inkişaf və xüsusuilə əlilliyi olan insanlar üçün biznes imkanlarının yaradılması məqsədini güdən yeni layihəyə imza atıblar.

BMT-nin İctimai İnformasiya Departamentindən verilən xəbərə görə, beş il müddətində davam edəcək “Əhalinin sosial cəhətdən həssas qrupları üçün inklüziv və layiqli iş yerlərinin yaradılması” adlı texniki yardım layihəsinin məqsədi əhalinin həssas təbəqələrindən olan işsiz şəxslərin potensialını artırmaq və onların formal əmək bazarında məhsuldar məşğulluğu üçün imkanlar yaratmaqdır. 

Əmək və Əhalinin Sosial Müdafiəsi Nazirliyi və BMTİP tərəfindən maliyyələşdirilən layihənin qarşısında duran olduqca ciddi məqsədlərdən biri icra müddətinin məhz ilk ilində əlilliyi olan 500 nəfərə dayanıqlı iş imkanlarının və şəxsi bizneslərin yaradılmasında dəstək göstərməkdir. Xüsusilə də az təminatlı və həssas sosial təbəqələrdən olan insanlara özünüməşğulluq fəaliyyətlərini həyata keçirmək üçün yardım etməyi nəzərdə tutan bu yeni təşəbbüs Azərbaycanın bütün regionları və paytaxt Bakını əhatə edəcək. 

Tədbiri giriş sözü ilə açan Əmək və Əhalinin Sosial Müdafiəsi Naziri cənab Sahil Babayev bu istiqamətə aparılan işlərdə, həyata keçirilən islahatlarda BMT-nin İnkişaf Proqramı ilə səmərəli əməkdaşlığın formalaşdığını qeyd edib. Birgə fəaliyyətin vacibliyini qeyd edən Nazir Babayev belə layihələrdən biri olan “Azərbaycanda İnnovasiya və Məşğulluğun İnkişafı” layihəsinin uğurlarını qeyd edib, Bakıda və ölkənin ayrı-ayrı bölgələrində təşkil olunan təlim mərkəzləri vasitəsilə gənclərə müasir iş axtarışı bacarıqlarının öyrədilməsinə, qısa müddətdə onların işlə təmin edilmələrinə dəstək verdiyini deyib. 

Bu gün imzalanan “Əhalinin sosial cəhətdən həssas qrupları üçün inklüziv və layiqli iş yerlərinin yaradılması” layihəsi çərçivəsində isə, Ən yaxşı biznes plan təqdim etmiş 500 nəfər əlilliyi olan şəxsə biznesin yaradılması və yeni yaranmış bizneslərin qeydiyyatdan keçirilməsində dəstək göstəriləcək. Daha sonra, seçilmiş startaplara dəstək qrantlarının təqdim olunması nəzərdə tutulur. Qrant dəstəyi çərçivəsində əlilliyi olan şəxslərə biznesin qurulması üçün tələb olunan avadanlıq və xammal veriləcək. 

Qarşıda duran məqsədlərin həyata keçirilməsi üçün, BMT-nin İnkişaf Proqramı Azərbaycanda dövlət siyasəti üzrə məsul şəxslərin və icraçıların səmərəli aktiv məşğulluq tədbirlərini hazırlamaq və icra etmək potensialının gücləndirilməsi istiqamətində də bir sıra addımların atılmasını nəzərdə tutur. 

İmzalanma mərasimində çıxış edən BMT-nin İnkişaf Proqramının Rezident Nümayəndəsinin səlahiyyətlərini icra edən cənab Alessandro Frakassetti qeyd etmişdir ki, bu kimi özünüməşğulluq layihələri sahibkarlığın hamı üçün işləyə biləcəyini göstərə bilər. O daha sonra bildirmişdir ki, "inkluziv məşğulluq imkanlarının artırılması sahəsində aparılan işlər “heç kim kənarda qalmasın” şüarı altında görülməlidir ki, bu da öz növbəsində Dayanıqlı İnkişaf Məqsədlərinin əldə edilməsini əhəmiyyətli dərəcədə sürətləndirə bilər". 

//Femida