Gəncədə Cavad xanın xatirəsi anılıb

Gəncədə şəhər ictimaiyyətinin iştirakı ilə Gəncə xanlığının sonuncu hökmdarı Cavad xanın anım mərasimi keçirilib.

Tədbir Gəncə Şəhər İcra Hakimiyyətinin təşkilatçılığı ilə Cavad xan türbəsinin önündə təşkil olunub.
Anım mərasimində Gəncə Şəhər İcra Hakimiyyətinin başçısı Niyazi Bayramov, şəhər rəsmiləri, ziyalılar, ictimaiyyət və KİV nümayəndələri iştirak ediblər. Niyazi Bayramov çıxış edərək qeyd edib ki, Cavad xan Vətənin azadlığı və istiqlaliyyəti uğrunda son anadək mərdliklə mübarizə aparıb, imperiya ordusunun əsgərləri ilə qeyri-bərabər döyüşdə qəhrəmancasına həlak olub: "Gəncə işğal olunduqdan sonra və Sovetlər dönəmində Cavad xanın adını anmaq yasaqlansa da, xalq qəhrəmanlarını unutmayb. Azərbaycan müstəqillik əldə etdikdən sonra Cavad xanın xatirəsinin əbədiləşdirilməsi istiqamətində bir sıra addımlar atılıb. 2004-cü ildə Heydər Əliyev Fondunun prezidenti Mehriban xanım Əliyevanın dəstəyi ilə Cavad xanın məzarı üzərində gördüyünüz bu tarixi üslubda türbə inşa olunub. Gəncənin ən qədim küçə və qəsəbəsinə onun adı verilib".
Mərasimdə çıxış edən tarix elmləri doktoru, professor Həsənbala Sadıqov tarixi faktları tədbir iştirakçılarının diqqətinə çatdırıb. O bildirib ki, Çar imperiyası qoşunlarının çoxsaylı həmlələrindən sonra Gəncə şəhəri 1804-cü il yanvarın 4-də işğal edilib: "Gəncənin müdafiəsində Cavad xan və ortancıl oğlu Hüseynqulu xan şəhid olublar. Qalanın müdafiəsi zamanı minlərlə gəncəli həlak olub. Şah Abbas məscidinə sığınan yüzlərlə insan isə son nəfərinədək qılıncdan keçirilib. Cavad xan çar imperiyası qoşunlarına qarşı mərdliklə mübarizə apararaq Azərbaycanın qəhrəmanlıq tarixinin şanlı səhifələrindən birini yazıb. O, tək Gəncənin yox, bütün Azərbaycanın müstəqillik rəmzidir".
Çıxışlardan sonra Gəncə Dövlət Dram Teatrının aktyorlarının təqdimatında Cavad xanın xatirəsinə həsr olunan səhnəçik nümayiş olunub. Daha sonra tədbir iştirakçıları Cavad xanın məzarını ziyarət edib, üzərinə gül dəstələri düzüblər.

//Report