“Nikol Paşinyan ehtiyat edir ki, Azərbaycanla...” - ŞOK İDDİA

"Ermənistanın baş naziri Nikol Paşinyan çox gözəl bilir ki, onun gedişi həm Zəngəzur dəhlizindən, həm də ölkədə müharibədən qaçmağa kömək edəcək, lakin o, hakimiyyəti itirmək istəmir".

News24.az "Musavat.com"-a istinadən xəbər verir ki, bu barədə yerli "Zham.am" portalı yazır.

"Paşinyan da bilir ki, Brüssel sənədinin imzalanması Ermənistanın süqutu deməkdir. Oktyabrın əvvəlində internetdə bir sənəd yayılıb. Ekspertlərin fikrincə, bu, Ermənistan və Azərbaycan arasında sülh müqaviləsinin Amerika variantıdır. Digər məsələlərlə yanaşı, Ermənistan hakimiyyəti tərəfindən rəsmi təkzib olunmayan sənəddə deyilir: "Azərbaycan hökuməti Dağlıq Qarabağın erməni etnik icmasının nümayəndəsi ilə çalışmaq üçün nümayəndə təyin edəcək və onunla Dağlıq Qarabağ sakinlərinin hüquq və təhlükəsizlik məsələlərini müzakirə edəcək... Nümayəndələr müzakirələrin beynəlxalq ictimaiyyət üçün şəffaf olmasını təmin edəcəklər. Tərəflər həmçinin Azərbaycanın suverenliyinə xələl gətirməyən beynəlxalq müşahidəçilərin rolunu, eləcə də Dağlıq Qarabağdakı azlıq qrupunun müdafiəsinin təmin edilməsini birgə müzakirə etməyə çalışacaqlar". Əslində, rəsmi İrəvan Qarabağın gələcəyində Ermənistanın bundan sonra da iştirakından nəinki imtina edir, həm də Qarabağ ermənilərini Azərbaycan Prezidenti İlham Əliyevin ixtiyarına buraxır. Qarabağın Azərbaycana birləşdirilməsindən sonra Qarabağ ermənilərini gözləyən ən yaxşı şey deportasiyadır.

Hətta Soçidə gözlənilən üçtərəfli görüşdən sonra rəsmi İrəvan Qərbin himayəsi altında Azərbaycanla sülh müqaviləsi imzalaya bilər. Nikol Paşinyan ehtiyat edir ki, Azərbaycanla münasibətlər Moskvanın təklif etdiyi modellə tənzimlənərsə, o zaman Rusiya üçün subyektivliyini, onunla birlikdə isə gücünü itirəcək. O bilir ki, əslində 9 noyabr bəyanatından geri çəkilib anti-Rusiya siyasəti yeritmək Ermənistan üçün fəlakətli nəticələrə gətirib çıxaracaq, amma Qərbdən sığınacaq alacağına əmin olduğu üçün bu yola gedir. Görəsən Ermənistanın siyasi və iqtisadi elitası Paşinyanın planının həyata keçirilməsinə mane ola biləcəkmi?", - deyə yazıda qeyd olunur.