Havanın kəskin enməsi hansı xəstəlikləri kəskinləşdirəcək? - Bu insanlar ehtiyatlı olsun

Sabahdan Azərbaycanda havanın temperaturunun kəskin dəyişəcəyi barədə artıq rəsmi xəbərdarlıq olunub. Səhiyyə Nazirliyi, həmçinin digər dövlət qurumları gücləndirilmiş rejimə keçib. 

Ekologiya və Təbii Sərvətlər Nazirliyinin Milli Hidrometeorologiya Departamenti havanın kəskin dəyişməsinin əksər əhali üçün əlverişsiz olacağına dair xəbərdarlıq yayıb.

Belə bir məqamda insanlar üçün faydalı olacaq material hazırladıq.

Kimlər risk altındadır?
Yanvarın 17-18-i tarixlərində bu problemləri olan insanlar xəstəlik kəskinləşəcək:

-Astma – bronxit xəstəliyi, boğulması olanlar
-Şəkərli diabet xəstələri
-Meteohəssas insanlar
-Yüksək təzyiqi olanlar
-Ürək-damar xəstəliyi, qan damarlarında ateroskleroz olanlar infarkt, insult keçirmiş insanlar, 
-Panik atak, nevroz və depressiyada olanlar
-Artroz, ostexondroz, artrit, revmatizması olanlar


Yüksək rütubət, aşağı temperature və soyuq iltihabi prosesləri aktivləşdirəcək. 

Qeyd edək ki, orqanizmin havaya  və kəskin iqlim dəyişməsinə reaksiyası meteopatiya adlanır.

Nə hiss edə bilərsiniz?
-Xüsusi təhlükəli hava şəraitində insanlarda səbəbsiz həyəcanlanma, qıcıqlanma, özündən çıxma, əsəbilik, yuxusuzluq və ya depressiv əlamətlər, süstlük, gərginlik tipli baş ağrıları artır. 

-Belə günlərdə həkimlərə və təcili yardıma səbəbsiz hal dəyişmələrdən, ağrılardan müraciətlər çoxalır. 

-Bəzən qarın boşluğunda və beldə spastik ağrılar başlayır, bunu zəhərlənmə ilə səhv də salırlar. 

 Təəssüf ki, belə havalarda və məqamlarda ürək-damar, beyin insultu səbəbindən ölüm hallarının sayı artır.

Sürətli külək səbəbindən yollarda kiçik travmalar alan şəxslərin də xəstəxanalara düşmə ehtimalı olur. 

Nə etməli?
-Valideynlər xəstə, zəif, arıq və ya xüsusi xəstəliyi olan uşaqları həmin gün qapalı şəraitdə, özləri də yanında olmaqla saxlamalı

-Yaşlı, təzyiqi olan insanlar evdə qalmalı, təzyiq tənzimləyici dərmanlarını vaxtında qəbul etməli, sakitləşdiricilər içməli, evdə fikirlərini maraqlı və xoş bir şeylə məşğul etməlidirlər

-Boğulması, astma bronxiti olanlar küləkli havada çölə çıxmamalı, dərmanları yanında olmalıdır

-Gözlərində iltihabı, kataraktası, zəifliyi olanlar, rinit, haymoriti olanlar da maksimum evdə və qapalı yerdə olmalı. Küçəyə çıxarlarsa, qayıdanda göz damcısı tökməli, burunlarını dəniz suyu ilə yumalıdırlar.

-Əsəbi, nevrozu, depressiyası olanlar isə mütləq sakitləşdiricilər qəbul etməli, evdə və ya işdə maksimum xoş təsir verən informasiya qəbul etməlidirlər

Məsləhət görərdik ki, havanın, küləyin təsirindən maksimum qorunmaq, orqanizmdə baş verəcək dəyişiklikləri nəzarətdə saxlamaq və bir şey olduğu halda özünüzə kömək etmək üçün bu günlərdə vacib olmadığı halda evdən çıxmayın.

//Medicina.az