Sabah Qızılağac və Ağgöl milli parklarında “açıq qapı” günü keçiriləcək

2 fevral “Ümumdünya Su-Bataqlıq Əraziləri Günü” ilə əlaqədar Qızılağac və Ağgöl milli parklarında “açıq qapı” günü keçiriləcək.

Bu barədə News24.az-a Bioloji Müxtəlifliyin Qorunması Xidmətinin rəsmisi Rəşad Allahverdiyev bildirib.

O qeyd edib ki, Azərbaycanda ümumi sahəsi 200 min hektardan artıq olan su-bataqlıq ərazisi mövcuddur və bu potensiala görə həmin ərazilərdə qışlama və köç mövsümündə 100 minlərlə ornitofauna növləri toplanır: “Daha geniş ornitoloji imkanlara malik Ağgöl və Qızılağac milli parkları 2001-ci il 25 may tarixindən beynəlxalq əhəmiyyətli Su-bataqlıq əraziləri haqqında Ramsar Konvensiyasının siyahısına daxil edilib.”

Xidmət rəsmisi əlavə edib ki, 2 fevral “Ümumdünya Su-Bataqlıq Əraziləri Günü” ilə əlaqədar Qızılağac və Ağgöl milli parklarında “açıq qapı” günü keçiriləcək. Ziyarətçilər sabah Qızılağac və Ağgöl milli parklarına ödənişsiz daxil olaraq ərazidə toplaşan çoxsaylı ornitofauna növlərini müşahidə edə biləcəklər.

Xatırladaq ki, sabah “Ümumdünya Su-Bataqlıq Əraziləri Günü”dür. “Bu il “Su-bataqlıq ərazilərini bərpa etmək vaxtıdır” çağırışı ilə qeyd olunur.