Almaniyada gözlənilməz qənaət planı: bəzi şəhərlər bundan imtina etdi

Almaniyanın bir sıra şəhərləri bu il küçələrdə Yeni il işıqlandırmasından qismən və ya tamamilə imtina edir. Qış mövsümündə bir çox küçələrdə işıq daha az olacaq, çünki ənənəvi Milad işıqlanması üçün vəsait çatmır.

News24.az xəbər verir ki, bu barədə “BILD” məlumat yayıb.

Milad işıqlandırması isə bölgədən bölgəyə dəyişir. Bəzi yerlərdə şəhər idarəetmə orqanları, bəzi yerlərdə isə sakinlər tərəfindən ödənilir.

Drezdendə barokko üslublu bayram işıqlandırması tamamilə ləğv edilib. Adətən burada 80 ağac işıqlandırılırdı. Lakin bu il ağacların budanması üçün şəhərin pulu olmayıb. Nəticədə ağacların budaqları həddindən artıq böyüyüb və lampaları asmaq mümkün olmayıb. Sahibkarlar öz hesablarına ağacları budamağı təklif etsələr də, şəhər buna icazə verməyib.

Ştutqartda da bəzi işıq skulpturları baha olması səbəbindən quraşdırılmayıb.

Heydelberq Milad işıqlarını əvvəlki kimi səhərdən yox, saat 15:00-dan yandıracaq və işıqlar yarmarka bağlandıqdan bir saat sonra söndürüləcək.

Hannoverin piyada zonasında işıqlar hələ yanır, lakin Milada qədər davam edib-etməyəcəyi məlum deyil. Ehtimallara görə, o zamana qədər  vəsait tükənə bilər.

Bir çox şəhərlər işıqlandırma üçün sakinlərdən ianə toplayır.

Maqdeburq yeni dekorativ elementlər üçün 400 min avro ayırıb, lakin daha təcili ehtiyaclar — xüsusilə köhnəlmiş körpülərin təmiri — ortaya çıxdığına görə bu vəsait ümumi büdcəyə qaytarılıb.

Şimalı Reyn-Vestfaliyadakı 28 min nəfərlik Şvelm şəhərində vəziyyət daha dramatikdir: şəhərin Milad işıqları quraşdırıldıqdan qısa müddət sonra naməlum şəxslər tərəfindən oğurlanıb.
Yeni işıqlandırmanın qiyməti 30 min avrodur, amma şəhərin bu pulu yoxdur. Sakinlər indi özəl donorların köməyinə ümid edir və hələlik bir neçə yay fənəri ilə kifayətlənirlər.