Almaniyada onlarla mübarizə üçün xüsusi struktur yaradıldı

Almaniyada dekabrın 2-dən etibarən Federal Polis rəsmən pilotsuz uçuş aparatları ilə mübarizə aparacaq öz xüsusi strukturunu yaradıb.

News24.az “Euronews”a istinadla xəbər verir ki, yeni bölmə diversiya, casusluq, terrorizm, ekstremizm və təşkil olunmuş cinayətkarlığa qarşı mübarizə aparan polis idarəsinin 11-ci şöbəsinə tabe edilib.

Hazırda dronlarla mübarizə qrupunun sayı onlarla əməkdaşdan ibarətdir. Gələcək planlara görə, onların sayı bir neçə yüz nəfərə çatdırılacaq. Bölmə əməkdaşları xüsusi təyinatlılar kimi hazırlıq keçəcək və dronlardan ağıllı müdafiənin ən yeni texnologiyalarından istifadə edəcəklər.

Bundan əlavə, Almaniya Daxili İşlər Nazirliyi federal və regional hüquq-mühafizə orqanlarının şübhəli uçan obyektlərlə bağlı məlumat mübadiləsi aparacağı və ortaq tədbirlər hazırlayacağı xüsusi koordinasiya mərkəzi də yaradır. Bu təşəbbüs barədə oktyabrda, Münhen hava limanının fəaliyyətindəki ciddi gecikmələr də daxil olmaqla, bir sıra insidentlərdən sonra açıqlama verilib.

2025-ci ilin qeyri-rəsmi statistikası göstərir ki, Almaniya üzərində yüzlərlə dron qeydə alınıb və onların üçdə ikisi ölkənin ən böyük hava limanlarının yaxınlığında müşahidə olunub.

Hazırda polisin imkanları dronların aşkarlanması, idarəetmə siqnallarının boğulması və fiziki zərərsizləşdirmə vasitələrini əhatə edir.