Avropa "sülh" adı altında öz planını satmağa çalışır – Lavrov

Avropalı siyasətçilər Rusiyaya qarşı irəli sürdükləri ittihamları əsaslandırmağa belə cəhd etmədən öz “xırdalıqlarını” nümayiş etdirirlər.

News24.az xəbər verir ki, bu barədə Rusiya xarici işlər naziri Sergey Lavrov Türkiyə mediasına verdiyi müsahibədə bildirib.

Lavrov xatırladıb ki, Ukrayna münaqişəsinin problemi ərazi məsələsi deyil, Rusiyaya aid hər şeyi məhv etmək istəyən nasist rejimidir. Nazir vurğulayıb ki, Ukrayna Qərbin əlində bir “piyada”, bir alətdir və Qərb ondan Rusiyanın təhlükəsizliyinə birbaşa təhdidlər yaratmaq üçün istifadə edir. Bu baxımdan, BMT-nin Baş katibi Antonio Quterreşin Ukrayna ilə bağlı mövqeyi ilə əlaqədar ciddi suallar yaranır.

Lavrov bildirib ki, Vaşinqtonun Ukrayna üzrə nizamlanmaya dair 28 maddəlik planına milli azlıqların, o cümlədən dil və dini hüquqların bərpası tələbi daxildir. Avropa və Kiyev ABŞ-nin Ukrayna ilə bağlı planını “alt-üst edib” və hazırda Amerika administrasiyasına bu “sülh” barədə öz “baxışlarını” “satmağa” çalışırlar.

Həmçinin, Lavrov qeyd edib ki, Rusiyada ABŞ ilə Ukrayna arasında təhlükəsizlik zəmanətləri ilə bağlı hər hansı saziş “görülməyib”.

Onun sözlərinə görə, Volodimir Zelenskinin nail olmağa çalışdığı atəşkəs Rusiya üçün “qəbuledilməzdir”.

“Zelenski rejimi bu qeyri-qanuni, legitimliyini itirmiş, kökləri 2014-cü ilin fevralında baş vermiş dövlət çevrilişi zamanı atılmış rejimin təhlükəsizliyini təmin etmək üçün çalışır”, – Lavrov deyib.

Rusiya XİN başçısı bildirib ki, Avropa Ukrayna ilə bağlı yaranan müsbət proseslərdə araya girmək və onları geriyə çevirmək istəyir.

Lavrov qeyd edib ki, Zelenski Fransa Prezidenti Emmanuel Makrondan və diplomatik etikanın bütün qanunlarını pozaraq məlumatları məsuliyyətsiz şəkildə sızdırmağı sevən digərlərindən nümunə götürür. Rusiya diplomatik görüşlərin məzmunu barədə məlumat sızdırmaq vərdişinə malik deyil və hesab edir ki, hamı danışıqlara ciddi yanaşmalıdır.