Finlandiya hökuməti qalmaqal içində: Baş nazir Asiya ölkələrindən üzr istədi

Finlandiyanın Baş naziri Petteri Orpo deputatların sosial şəbəkələrdə paylaşdığı təhqiramiz görüntülərlə bağlı yaranan qalmaqaldan sonra Asiya ölkələrindən rəsmi şəkildə üzr istəyib.

News24.az xəbər verir ki, bu barədə “Reuters” məlumat yayıb.

Orpo Çin, Yaponiya və Cənubi Koreyadakı Finlandiya səfirlikləri vasitəsilə yaydığı bəyanatda səmimi üzrxahlığını ifadə edib.

“Bu paylaşımlar Finlandiyanın bərabərlik və inklüzivlik dəyərlərini əks etdirmir”, – deyə Orpo bildirib.

Onun sözlərinə görə, Finlandiya hökuməti irqçiliyə ciddi yanaşır və bu problemlə mübarizədə qətiyyətlidir.

Qalmaqal bu ayın əvvəlində “Miss Finlandiya” titulunun sahibi olan Sara Dzafcenin dostunun sosial şəbəkə paylaşımında “çinli ilə yemək yeyirəm” qeydi ilə gözlərini çəkərək poza verməsindən sonra başlayıb.

Asiya mənşəli olmayan Dzafce sonradan üzr istəyərək niyyətinin heç kimi təhqir etmək olmadığını bildirsə də, titulundan məhrum edilib.

Bundan sonra “Finlər Partiyası”ndan olan Finlandiya parlamentinin iki üzvü və Avropa Parlamentinin bir üzvü oxşar fotolar paylaşaraq eyni jesti təkrarlayıblar.

Qeyd edək ki, Orponun hökuməti hələ 2023-cü ildə fəaliyyətə başladıqdan qısa müddət sonra “Finlər Partiyası”ndan olan bir neçə nazirin irqçi paylaşımları səbəbindən etimadsızlıq səsverməsi ilə üzləşib.