İslamabada PUA hücumunun qarşısı alındı

Pakistan silahlı qüvvələri paytaxtın peyk şəhəri olan Ravalpindi yaxınlığında iki pilotsuz təyyarəni zərərsizləşdirib.

News24.az xəbər verir ki, bu barədə "Dawn" qəzeti təhlükəsizlik mənbələrinə istinadən məlumat yayıb.

Məlumata görə, PUA-lar elektron hərbi sistemlər vasitəsilə ələ keçirilib. İtki və ya ziyan qeydə alınmayıb.

Nəşrin mənbələrinə görə, paytaxt rayonu üzərindəki hava məkanı müvəqqəti olaraq bağlanıb, lakin məhdudiyyətlər tezliklə aradan qaldırılıb. Pakistan Hava Limanları İdarəsi İslamabad Beynəlxalq Hava Limanının normal fəaliyyət göstərdiyini və bütün uçuşların cədvələ uyğun olaraq həyata keçirildiyini təsdiqləyib.

Əfqanıstan Müdafiə Nazirliyi daha əvvəl İslamabaddakı hərbi obyektə hava hücumları barədə məlumatı təsdiqləyib. Nazirliyin məlumatına görə, hücum "düşmənə xeyli insan və maddi itki" ilə nəticələnib.

12 martda Pakistan Hərbi Hava Qüvvələri Kabilə hava hücumları həyata keçirib. Əfqanıstanın Qəndəhar, Paktiya və Paktika əyalətlərindəki hədəflərə də hücum edilib. Cavab olaraq Əfqanıstan Pakistanın Xayber Paxtunxva əyalətindəki hərbi hədəflərə zərbələr endirib. (Teleqraf)