İspaniya Seutada fövqəladə tədbirlərə başladı

İspaniya Mərakeşlə sərhəddə yerləşən Seuta muxtar şəhərinə miqrant axınının dayanmağa başladığını açıqlayıb. Bununla yanaşı, ölkə Mərakeş sərhədi boyunca 500 metrlik üzən maneənin quraşdırılmasına başlayıb.

News24.az xəbər verir ki, İspaniya hakimiyyətinin məlumatına görə, cümə axşamından etibarən təxminən 50 min nəfər quru və dəniz yolu ilə Seutaya daxil olub. Onlardan 48 mindən çoxu 48 saat ərzində Mərakeşə geri qaytarılıb.

Hadisə zamanı azı 67 nəfər həlak olub. Onların bir qismi boğulub, digərləri isə sərhəd hasarı və dalğaqıranı keçməyə çalışarkən həyatını itirib.

İspaniyanın daxili işlər naziri Fernando Qrande-Marlaska bildirib ki, vəziyyət əsasən nəzarət altına alınıb, lakin sərhəddə gücləndirilmiş polis və hərbi qüvvələr hələlik saxlanılacaq. O, həmçinin Mərakeşi İspaniyanın "etibarlı tərəfdaşı" adlandırıb.

Böhran Avropa İttifaqında da narahatlıq yaradıb. 22 Aİ ölkəsi daxili işlər nazirlərinin fövqəladə iclasının keçirilməsini tələb edərək, Seutadakı vəziyyətlə bağlı İspaniyaya əlavə dəstək göstərilməsinə çağırıb.