Pəhləvi çağırış etdi: Silahı yerə qoyun, xalqın tərəfinə keçin!

İranın keçmiş şahının oğlu və müxalif etirazların lideri Rza Pəhləvi ölkənin təhlükəsizlik qüvvələrini silahı yerə qoymağa çağırıb.

News24.az xəbər verir ki, o bu barədə sosial şəbəkə platformalarında video müraciət yayımlayıb.

“İslam Respublikasını devirmək məqsədilə milli üsyanın yeni mərhələsini elan edirəm. Silahlı qüvvələrin və təhlükəsizlik orqanlarının üzvləri xalqın tərəfinə keçmək imkanına malikdirlər”, - deyə Pəhləvi “Telegram” kanalında bildirib.

Pəhləvi İran xalqına və təhlükəsizlik qüvvələrinə müraciətində əsas məqsədinin ayətullahların hakimiyyətinə son qoymaq və ölkədə əvvəllər mövcud olmuş rejimi bərpa etmək olduğunu vurğulayıb.

O əlavə edib ki, təhlükəsizlik qüvvələri ölkənin mərkəzi küçələrinin və hökumət binalarının mühafizəsinə cavabdehdir.

Pəhləvi həmçinin xaricdəki İran səfirliklərində İranın köhnə milli bayraqlarının asılmasına çağırıb.

Bundan əlavə, müxalifət lideri tərəfdaşları və sponsorları tərəfindən qlobal yardım vəd edib.