Rusiya-Ukrayna müharibəsinin hərbi mənzərəsi – Gerasimov hesabatı açıqladı

Rusiya Silahlı Qüvvələrinin Baş Qərargah rəisi Valeri Gerasimov xarici dövlətlərin hərbi attaşeləri üçün keçirdiyi brifinqdə xüsusi hərbi əməliyyat zonasında vəziyyətlə bağlı bir sıra açıqlamalar verib.

News24.az xəbər verir ki, Gerasimovun sözlərinə görə, 2025-ci il ərzində Rusiya ordusu 300-dən çox yaşayış məntəqəsini ələ keçirib, ümumilikdə 6 300 kvadrat kilometrdən artıq ərazi Rusiyanın nəzarətinə keçib.

Gerasimovun açıqlamasına əsasən, Kursk istiqamətində Ukrayna Silahlı Qüvvələrinin itkiləri 76 mindən çox olub.

Baş Qərargah rəisi qeyd edib ki, “Cənub” qoşun qruplaşması Donbas ərazisində 48 yaşayış məntəqəsini ələ keçirib. Hazırda Donetskin Konstantinovka şəhərinin təxminən 50 faizi Rusiya qüvvələrinin nəzarəti altındadır. Zaporojye istiqamətində hücumlar fasiləsiz aparılır. Son bir il ərzində bu istiqamətdə təxminən 2 min kvadrat kilometr ərazi və 89 yaşayış məntəqəsi azad edilib.

Gerasimov, həmçinin Zaporojye Atom Elektrik Stansiyasının təhlükəsizliyinin tam təmin edildiyini vurğulayıb.

Brifinqdə bildirilib ki, Rusiyanın strateji nüvə qüvvələrində müasir silahların payı 92 faizə çatıb.

Gerasimovun iddiasına görə, Ukrayna ordusunda dezertirlik kütləvi xarakter alıb. Rəsmi məlumatlara əsasən, hər ay 30 minə qədər hərbçi xidmət yerini tərk edir.