Azərbaycan nümayəndə heyəti quru yolla Ermənistana getdi - Foto - Video

Ermənistanda “Sülh Körpüsü” təşəbbüsü çərçivəsində 13–14 fevral tarixlərində ikitərəfli dəyirmi masa keçiriləcək.

News24.az xəbər verir ki, görüş zamanı Ermənistan və Azərbaycanın vətəndaş cəmiyyəti nümayəndələri bir araya gələcəklər. “Sülh Körpüsü”nün əsas iştirakçıları ilə yanaşı, hər iki tərəfdən daha geniş iştirakçı qrupları da tədbirə qatılacaq.

Məlumata görə, Azərbaycan nümayəndə heyəti bütün zəruri prosedurlardan keçərək quru sərhədinin delimitasiya və demarkasiya olunmuş hissəsindən Ermənistan ərazisinə daxil olub.

Müzakirələr zamanı tərəflər 8 avqust 2025-ci ildə Vaşinqton sammitində təsdiqlənmiş sülh gündəliyindən irəli gələn prosesləri nəzərdən keçirəcəklər. Ayrı-ayrı sessiyalar formalaşmaqda olan regional təhlükəsizlik arxitekturasına, sülhün üstünlüklərinə, iki cəmiyyət arasında münasibətlərin qurulmasına ictimai baxışa, iqtisadi əməkdaşlıq perspektivlərinə, eləcə də qarşılıqlı anlaşma və etimadın gücləndirilməsində vətəndaş cəmiyyətinin roluna həsr olunacaq.

Azərbaycan tərəfdən iştirakçılar:

Fərhad Məmmədov — koordinator, Cənubi Qafqaz Tədqiqatlar Mərkəzinin direktoru

Rusif Hüseynov — Topçubaşov Mərkəzinin direktoru

Kamala Məmmədova — 1news.az onlayn nəşrinin baş redaktoru

Ramil İsgəndərli — Milli QHT Forumunun idarə heyətinin sədri

Fuad Abdullayev — Beynəlxalq Münasibətlərin Təhlili Mərkəzinin aparıcı mütəxəssisi

Könül Bədəlova — İqtisadi İslahatların Təhlili və Kommunikasiya Mərkəzinin elmi işçisi

Zaur Şiriyev — Karnegi Rusiya və Avrasiya Mərkəzinin eksperti

Murad Muradov — Topçubaşov Mərkəzinin direktor müavini

Aytən Qəhrəman — Bakı Beynəlxalq Multikulturalizm Mərkəzinin məsləhətçisi

Rauf Ağamirzəyev — nəqliyyat üzrə ekspert, Rəqəmsal İnkişaf və Nəqliyyat Nazirliyi yanında İctimai Şuranın üzvü

Gülbəniz Qənbərova — “Kənd İcmaları Qadın Birliyi” QHT-nin prezidenti

Nazrin Əliyeva — “İnsan Hüquqlarına Dəstək Mərkəzi” QHT-nin nümayəndəsi

Eldar Həmzəli — tədqiqatçı, müstəqil ekspert

Sanan Rzayev — CBC telekanalının redaktoru və aparıcı siyasi şərhçisi

Gülşən Axundova — “Qadınlar, İnkişaf, Gələcək” QHT-nin prezidenti

Emin Əliyev — TREND beynəlxalq informasiya agentliyinin baş redaktoru

Orxan Babayev — Cənubi Qafqaz Tədqiqatlar Mərkəzinin əməkdaşı

İlyas Hüseynov — Sosial Tədqiqatlar Mərkəzinin şöbə müdiri

Fuad Ağamalıyev — CBC telekanalının mühəndis-texniki şöbəsinin rəhbəri (Armenpress)