Yuyucu çanağa qaynar su tökənlərə XƏBƏRDARLIQ

Mətbəx və ya vanna otağında təmizlik zamanı yuyucu çanağa qaynar su tökmək bir çox insanın adi vərdişidir. Lakin mütəxəssislər xəbərdarlıq edirlər ki, bu sadə addım evin santexnika sisteminə ciddi zərər vura və bahalı təmir xərclərinə səbəb ola bilər.

News24.az xəbər verir ki, xüsusilə müasir evlərdə istifadə olunan plastik (PVC) borular yüksək temperatura qarşı həssasdır. Qaynar suyun birbaşa yuyucu çanağa tökülməsi boruların genişlənməsinə, yumşalmasına və hətta deformasiyaya uğramasına gətirib çıxara bilər.

Mütəxəssislərin sözlərinə görə, yüksək temperatur boru birləşmələrindəki rezin möhürlərin də zədələnməsinə səbəb olur. Bu isə zamanla su sızmasına, divarlarda rütubətin yaranmasına və hətta aşağı mərtəbələrə su axmasına gətirib çıxara bilər.

Bundan başqa, yuyucu çanaqda artıq tıxanma varsa, qaynar su problemi aradan qaldırmaq əvəzinə daha da ağırlaşdıra bilər. İsti su plastik boruların yumşalmasına səbəb olaraq tıxanmanın daha dərinləşməsinə yol aça bilər.

Bu səbəbdən mütəxəssislər yuyucu çanağa birbaşa qaynar su tökmək əvəzinə ilıq su və xüsusi təmizləyici vasitələrdən istifadə etməyi tövsiyə edirlər.

Nilufər