6 min qiyməti olan "iPhone Duo"nu təmir etmək mümkündür?

“Apple” şirkətinin ilk qatlanan smartfonu olan “iPhone Duo”-nu sökərək cihazın daxili quruluşu araşdırılıb.

News24.az xəbər verir ki, mütəxəssislər smartfonun təmirə yararlılığını 10 mümkün baldan 5 balla qiymətləndiriblər.

Araşdırma zamanı əsas diqqət cihazın mürəkkəb menteşə mexanizminə və daxili ekranına yönəldilib.

Mütəxəssislər bildiriblər ki, mexanizm dişli çarxlardan, yaylardan və bir-birinə birləşdirilmiş metal elementlərdən ibarətdir.

Xüsusi konstruksiya telefon açılıb-bağlanarkən ekrana düşən yükü azaltmağa xidmət edir.

Bununla belə, bəzi istifadəçilər smartfonun daxili ekranında çatların və rəngli xətlərin yarandığını bildiriblər. Hətta bir istifadəçi cihazı qutusundan çıxardıqdan cəmi altı saat sonra ekranın sıradan çıxdığını iddia edib.

Mütəxəssislər ehtimal edirlər ki, problemin səbəbi menteşənin konstruksiyası ilə bağlı ola bilər. Telefon qatlanarkən mexanizmin mərkəzi dayağı kifayət qədər aşağı enmədikdə ekrana təzyiq göstərə bilər. Bundan əlavə, menteşəyə daxil olan toz və digər xırda hissəciklər də ekranın zədələnməsi riskini artıra bilər.

Mütəxəssislər cihazın tozdan qorunma xüsusiyyətlərini də yoxlayıblar. Sınaq zamanı menteşəyə az miqdarda toz daxil olsa da, mexanizmdən xırıltılı səslər gəldiyi müşahidə olunub.

Bununla yanaşı, smartfonun bəzi komponentlərinin dəyişdirilməsinin nisbətən asan olduğu qeyd edilib.

Lakin cihazın yekun təmirə yararlılıq qiyməti ehtiyat hissələrinin əlçatanlığından da asılı olacaq.