Ağ-qara yuxular xəstəlik əlamətidir? - Psixiatr açıqladı

Ağ-qara yuxu görmək xəstəlik əlaməti deyil.

News24.az xəbər verir ki, bunu rusiyalı psixiatr, psixoterapevt və məhkəmə eksperti Anton Şestakov deyib.

“Rəngli yuxu, ümumiyyətlə düşündüyümüzdən daha qeyri-sabit bir məsələdir. Gecə beyin yaddaş və emosiyalardan obrazlar yaradır, rəng çaları isə çox vaxt ikinci dərəcəli detal olur.

Buna görə də, bir çox insan oyandıqdan sonra yuxunun rəngli olub-olmadığını sadəcə deyə bilmir. Bu, tamamilə normaldır”, — deyə o izah edib.

Həkimin sözlərinə görə, gündəlik həyatda gördüklərimiz yuxuların rəng palitrasına ciddi təsir göstərir. Uşaqlıqdan ağ-qara ekran qarşısında böyüyən insanlar daha çox belə yuxular görürlər.

Uşaqlıqdan rəngli görüntülərlə əhatə olunan insanlar isə demək olar ki, həmişə rəngli yuxular görürlər.

Yəni yuxunun rəngi hansısa problemin göstəricisindən daha çox insanın vizual təcrübəsinin əksidir.

“Əsas məsələ rəngin özü deyil, onu nələrin müşayiət etməsidir. Əgər insan qəfildən yuxularının sanki rəngini itirdiyini, solğun və boz olduğunu hiss edirsə və eyni zamanda real həyatda da hər şey əvvəlkindən daha tutqun görünürsə - sevinc yox olur, dünya cansıxıcı və rəngsiz təsir bağışlayır, əvvəllər maraq göstərdiyi şeylərə marağını itirirsə, bu zaman öz vəziyyətinə diqqət yetirmək lazımdır. Çox vaxt əhval-ruhiyyənin aşağı düşməsi özünü məhz belə göstərir: dünya həm gerçəklikdə, həm də yuxuda sanki rənglərini itirir”, — deyə həkim qeyd edib.

Narahatedici əlamətlər təxminən belədir: yuxu artıq insanı dincəltmir, təkrarlanan ağır yuxular narahat edir, səhərlər insan özünü əzgin hiss edir, gün ərzində isə həftələrlə davam edən ruh düşkünlüyü olur.

Rəngsiz yuxularla yanaşı bunlardan hər hansı biri müşahidə olunursa, psixoterapevt, psixiatr və ya somnoloqa müraciət etmək məqsədəuyğundur.

Burada problem yuxuların rəngində deyil, diqqət və dəstək tələb edən ümumi psixoloji vəziyyətdədir.

“Əgər bunların heç biri yoxdursa və sizi yalnız yuxunun niyə rəngsiz olduğu maraqlandırıbsa, rahat yatmağa davam edin. Bu, sadəcə beynimizin çoxsaylı xüsusiyyətlərindən biridir və heç də diaqnoz deyil”, — deyə o yekunlaşdırıb.