Ağ saçların yaranması əslində nə deməkdir?

Yaponiyalı alimlər ağ saçların yaranması ilə bağlı maraqlı nəticəyə gəliblər. Araşdırmaya görə, saçların ağarması bəzən orqanizmin DNT zədələnməsinə qarşı müdafiə reaksiyası ola bilər.

News24.az-ın xəbərinə görə, bildirilir ki, tədqiqat zamanı saç follikullarındakı kök hüceyrələrin davranışı araşdırılıb. Məlum olub ki, DNT zədələndikdə bu hüceyrələr çoxalmağı dayandırır və nəticədə saçların ağarmasına səbəb olan dəyişikliklər baş verir.

Alimlərin fikrincə, bu mexanizm zədələnmiş hüceyrələrin nəzarətsiz şəkildə çoxalmasının qarşısını alır və şiş əmələ gəlməsi riskini azalda bilər.

Tədqiqat müəllifləri qeyd edirlər ki, ağ saçlar və dəri xərçəngi riski eyni hüceyrə mexanizminin fərqli nəticələri kimi qiymətləndirilə bilər. Bəzi hallarda hüceyrələrin bu qoruyucu reaksiyadan yayınması onların yenilənməsini davam etdirsə də, xərçəng riskini artıra bilər.

Araşdırma heyvanlar üzərində aparılsa da, əldə olunan nəticələrin insan orqanizmində baş verən bioloji proseslərin daha yaxşı başa düşülməsinə kömək edə biləcəyi vurğulanır. (Libertatea)