Bahalı təmizləyicilərə ehtiyac yoxdur – ekspertlərdən effektiv üsul

Mikrodalğalı sobanı təmizləmək üçün limon və buxardan istifadə həm effektiv, həm də ekoloji cəhətdən təhlükəsiz üsul hesab olunur.

News24.az xəbər verir ki, "Martha Stewart" nəşrinin yazdığına görə, limonlu su qızdırıldıqda yaranan buxar qurumuş qida qalıqlarını yumşaldır, limon turşusu isə yağ və çirki parçalamağa kömək edir. Nəticədə sobanı kimyəvi təmizləyici vasitələr olmadan daha asan təmizləmək mümkündür.

Mütəxəssislərin sözlərinə görə, əsas işi məhz buxar görür, limon isə həm təmizləmə effektini artırır, həm də xoş qoxu yaradır.

Təmizləmə üçün bir limonun şirəsini mikrodalğaya uyğun qaba sıxın, üzərinə təxminən bir stəkan su əlavə edin və limonun qabıqlarını da içinə qoyun. Qarışığı 3–5 dəqiqə yüksək gücdə qızdırın, daha sonra qapını açmadan təxminən 5 dəqiqə gözləyin. Sonda sobanın içini mikrofiber parça ilə silin.

Çox yapışmış ləkələr olduqda isə əvvəlcə limon və duzla səthi ovmaq, yaxud limon şirəsi ilə qida sodasından hazırlanmış pastanı ləkələrin üzərinə çəkib 10 dəqiqə saxlamaq tövsiyə edilir. Mütəxəssislər qab yuyucu mayedən istifadə etməməyi məsləhət görürlər, çünki onu tam təmizləmək çətin olur.