Bir vaxtlar sərvət sayılırdı, indi isə alıcısı tapılmır

Bir vaxtlar kolleksiyaçıların böyük maraq göstərdiyi bəzi əşyalar artıq əvvəlki dəyərini itirməyə başlayıb. Mütəxəssislər hesab edirlər ki, zövqlərin dəyişməsi, nəsillər arasındakı fərqlər və bazarda təklifin çoxalması bir sıra antik və kolleksiya əşyalarının qiymətinin aşağı düşməsinə səbəb olur.

News24.az xəbər verir ki, bu barədə "Country Living" nəşri antikvar bazarı üzrə ekspertlərin rəylərinə əsaslanaraq məlumat yayıb.

Mütəxəssislərin sözlərinə görə, ən çox dəyər itirən əşyalar sırasında ənənəvi dekorativ məmulatlar, zərif çini qablar və yemək servisləri yer alır. Müasir mənzillərin daha kiçik olması və minimalist interyerlərin populyarlaşması bu məhsullara marağı azaldıb.

Ekspertlər həmçinin bildirirlər ki, klassik vinil vallar və retro oyuncaqlar da əvvəlki qədər tələbat görmür. Kolleksiyaçıların diqqəti artıq əvvəlki nəsillərin deyil, öz uşaqlıq dövrlərinə aid əşyalara yönəlir.

Məhdud sayda buraxılan DVD və CD kolleksiyaları da rəqəmsal platformaların yayılması ilə dəyərini itirib. Eyni tendensiya ənənəvi tünd rəngli taxta mebellərə və xatirə məqsədilə istehsal olunan dekorativ boşqablara da aiddir.

Ekspertlər qeyd edirlər ki, kolleksiya bazarında nostalji mühüm rol oynayır. Bir nəslin qiymətli hesab etdiyi əşya növbəti nəsil üçün heç bir məna daşımaya bilər. Buna görə də kolleksiya əşyalarının gələcəkdə nə qədər dəyər qazanacağını proqnozlaşdırmaq getdikcə çətinləşir.