Bu qaydaya əməl etsəniz, yataq dəstləriniz yumşaq qalacaq

Təmiz və yumşaq yataq dəstləri həm rahat yuxu, həm də komfort hissi yaradır. Mütəxəssislər isə bildirirlər ki, bəzi sadə qaydalara əməl etməklə yataq dəstlərinin həm yumşaqlığını qorumaq, həm də istifadə müddətini uzatmaq mümkündür.

News24.az xəbər verir ki, onların sözlərinə görə, yataq dəstlərinin zamanla sərtləşməsinin əsas səbəblərindən biri yuyucu vasitələrin qalıqları, sərt sudakı minerallar, dəri yağları və parça yumşaldıcılarının liflər üzərində toplanmasıdır. Bu çöküntülər parçanın nəfəs alma qabiliyyətini azaldır və onu kobudlaşdırır.

Mütəxəssislər yataq dəstlərinin yuyulması zamanı yaxalama mərhələsində yarım stəkan ağ sirkə əlavə etməyi tövsiyə edirlər. Bildirilir ki, ağ sirkə liflərdə toplanan qalıqları həll edir, parçanın yumşaqlığını bərpa edir və ona təravətli görünüş verir.

Bundan əlavə, yüksək temperaturda qurutmanın da yataq dəstlərinə mənfi təsir etdiyi qeyd olunur. İsti hava lifləri zədələyərək onların sərtləşməsinə səbəb ola bilər. Buna görə yataq dəstlərini orta və ya aşağı temperaturda qurutmaq məsləhət görülür.

Mütəxəssislər həmçinin yataq dəstlərinin yuyulması zamanı parça yumşaldıcılarından istifadə etməməyi tövsiyə edirlər. Onların fikrincə, bu vasitələr qısamüddətli yumşaqlıq hissi yaratsa da, zamanla liflərin üzərində təbəqə əmələ gətirərək parçanın keyfiyyətini pisləşdirir.

Digər vacib məqam isə suyun temperaturudur. Ekspertlər bildirirlər ki, çox isti su gigiyenik görünsə də, parçanın rəngini soldura və liflərin quruluşunu poza bilər. Bu səbəbdən yataq dəstlərini ilıq və ya soyuq suda yumaq daha məqsədəuyğun hesab olunur.

Mütəxəssislərin tövsiyələrinə görə, daha yumşaq və uzunömürlü yataq dəstləri üçün:

• yuyucu vasitədən normadan artıq istifadə edilməməli;

• yaxalama zamanı ağ sirkə əlavə olunmalı;

• aşağı və ya orta temperaturda qurudulmalı;

• parça yumşaldıcılarından mümkün qədər imtina edilməlidir.