Dünyanın ən kiçik şəhəri – Cəmi iki küçəsi və 20 sakini var

Xorvatiyanın İstriya bölgəsində yerləşən Hum şəhəri “dünyanın ən kiçik şəhəri” kimi Ginnesin Rekordlar Kitabına düşüb.

News24.az xəbər verir ki, Mirna çayı üzərindəki bir təpədə salınan bu kiçik şəhərdə cəmi 20 nəfər yaşayır və iki daş küçə var.

Tarixi XI əsrə qədər uzanan Hum haqqında maraqlı bir əfsanə də var. Rəvayətə görə, bir vaxtlar bölgədə yaşayan nəhənglər digər şəhərləri tikdikdən sonra qalan son daşlarla Hum şəhərini inşa ediblər.

Qəsəbə əsrlər boyu böyüməsə də, tarixi irsini qoruyub saxlayıb. Qlaqolitik əlifba, yəni ən qədim slavyan yazısı burada XX əsrin əvvəllərinə qədər istifadə olunub.

Bu gün də Müqəddəs Jerom kapellasının divarlarında 12-ci əsrə aid qlaqolit yazıları olan freskaları görmək olar.

Şəhərin görməli yerləri arasında 1552-ci ildə tikilmiş daş müşahidə qülləsi, qədim şəhər qapıları, Roman üslubundakı kilsələr və yerli muzey var.

Humu qonşu Rok kəndinə birləşdirən “Qlaqolitik küçə” adlı 7 kilometrlik tarixi yol isə şəhərin ən məşhur marşrutudur. Bu yolun kənarında qədim əlifbanın hər bir hərfinə həsr olunmuş daş abidələr yerləşir.

Ərazisinin kiçik olmasına baxmayaraq, Hum həm tarixi, həm təbiəti, həm də sakit atmosferi ilə dünyanın ən maraqlı şəhərlərindən biri hesab olunur.

Xeyrənsə Piriyeva