Geyimlərinizdəki qəhvə ləkəsini belə yox edin

Ağ sviter geyinməyi sevənlərin qorxulu yuxularından biri də qəhvə ləkəsidir.

News24.az xəbər verir ki, bu ləkələrdən xilas olmaq üçün bir neçə təbii üsul var.

Bu üsullarla ağ sviterlərinizdə qəhvə kimi qalıcı ləkələrin yaranmasının qarşısını ala bilərsiniz.

Sviterə tökülən qəhvə ləkəsini aradan qaldırmağın ən asan üsulları aşağıdakılardır:

Karbonat:

Əvvəlcə ləkənin olduğu hissəni soyuq su ilə yüngülcə isladın. Üzərinə kifayət qədər karbonat səpib, məcun halına gəlməsi üçün bir neçə damcı su əlavə edin. Karbonatı ləkənin üzərinə zərif şəkildə basdıraraq yayın. Təxminən 15 dəqiqə gözləyin ki, karbonat qəhvəni özünə çəksin. Vaxt tamam olduqdan sonra sviterin etiketində göstərilən qaydalara uyğun şəkildə yuyun.

Ağ sirkə:

Təmiz bir qabda bərabər miqdarda ağ sirkə və soyuq su qarışdırın. Hazırladığınız qarışığa təmiz bir parça batırın. Parçanı ləkənin üzərinə tətbiq edin və sürtməməyə diqqət edin. Ləkə açılmağa başladıqda prosesi bir neçə dəfə təkrarlayın. Daha sonra sviterdə sirkə qoxusu qalmaması üçün onu yuyun.

Limon suyu:

Təzə sıxılmış limon suyunu birbaşa ləkənin üzərinə damladın. Limonun təbii turşusu sayəsində qəhvə ləkəsinin rəngi açılacaq. Ləkəli hissəni günəş görməyən yerdə 10–15 dəqiqə saxlayın. Daha sonra soyuq su ilə yuyun. Həssas parçalarda tətbiq etməzdən əvvəl kiçik bir sahədə sınaqdan keçirin.