Moskva ilə Bakı arasında kruiz səfərləri olacaq

Moskva ilə Bakı arasında kruiz xəttinin fəaliyyətinə yaxın vaxtlarda başlanıla bilər.

News24.az xəbər verir ki, bu barədə Rusiyanın Azərbaycandakı ticarət nümayəndəsi Adam Hakimov "Zvezda" telekanalına açıqlamasında bildirib.

"Yaxın vaxtlarda Moskva — Bakı kruiz laynerini işə salmağı planlaşdırırıq", — deyə o qeyd edib.

Hakimov bildirib ki, səyahətin müddəti orta hesabla 14 gün — hər tərəfə yeddi gün olmaqla təşkil etməlidir.

Onun sözlərinə görə, söhbət lüks sinfinə aid laynerdən gedir.

Bu layihə dövlət dəstəyini nəzərdə tutur: tikintini, o cümlədən Rusiya Sənaye və Ticarət Nazirliyi subsidiyalaşdırmaq niyyətindədir.

"Bu gün artıq hazır olan gəmi var və daha iki gəmi hazırlanma mərhələsindədir. Ümid edirik ki, həmin iki gəmi də Bakıya doğru üzəcək", — deyə ticarət nümayəndəsi vurğulayıb.