Valideynlərin qorxduğu vərdiş əslində inkişaf əlaməti ola bilər

Kiçik yaşlı uşaqların yalan danışması bir çox valideyni narahat etsə də, mütəxəssislər bunun normal və hətta sağlam psixoloji inkişafın göstəricisi olduğunu bildirirlər.

News24.az xəbər verir ki, “YourTango” nəşrinin yazdığına görə, psixoloqlar uşaqların yalan danışmasının onların intellekti və yaradıcılığı ilə əlaqəli ola biləcəyini qeyd edirlər.

Tətbiqi psixologiya və insan inkişafı üzrə professor Kan Linin araşdırmalarına əsasən, uşaqlar iki yaşından etibarən yalan danışmağa başlayırlar. İkiyaşlı uşaqların təxminən 30 faizi, üçyaşlıların yarısı, dördyaşlıların isə 80 faizi müəyyən hallarda yalan danışır.

Mütəxəssislərin fikrincə, uşağın yalan danışa bilməsi üçün iki mühüm bacarığa malik olması lazımdır: başqalarının düşüncələrinin öz düşüncələrindən fərqli olduğunu anlamaq və davranışlarına nəzarət edə bilmək. Bu bacarıqlar isə idrak inkişafının vacib göstəriciləri hesab olunur.

Uşaq psixiatrı Maykl Brodi bildirib ki, kiçik yaşlı uşaqlar həqiqətlə fantaziyanı tam ayırd edə bilmirlər. Özünü əjdaha və ya şahzadə kimi təqdim etmələri onların zəngin təxəyyülünün və normal inkişafının bir hissəsidir.

Mütəxəssislər vurğulayırlar ki, valideynlər uşaqları yalan danışmağa təşviq etməməli olsalar da, erkən yaşlarda bu davranışın çox vaxt normal inkişaf prosesi ilə bağlı olduğunu nəzərə almalıdırlar. Onların fikrincə, bu xüsusiyyət intellekt, yaradıcılıq və fərdiliyin əlaməti ola bilər.