Bayramdan sonra niyə yorğun oluruq? - Səbəbi bu imiş

Bayram günlərində gec saatlara qədər davam edən qonaqlıqlar, dəyişən yuxu rejimi və gündəlik qaydanın pozulması bir çox insanın bioloji ritminə təsir edir. Bir neçə gün davam edən bu həyat tərzi dəyişiklikləri bayramdan sonra iş rejiminə qayıtmağı çətinləşdirir və insanlar tez-tez halsızlıq, yuxululuq və diqqət dağınıqlığından şikayət edirlər.

News24.az bayram günlərindən sonra orqanizmin pozulmuş ritmini bərpa etməyin yollarını təqdim edir.

Bioloji saatın pozulması nə ilə nəticələnir?

Mütəxəssislərin fikrincə, axşamlar gec yatmaq və səhərlər gec oyanmaq bədənin təbii bioloji saatını dəyişdirir. Bu zaman xoşbəxtlik hormonu hesab edilən serotonin azalır, yuxu hormonu olan melatoninin ifraz vaxtı isə dəyişir.

Nəticədə orqanizm gecə tam dincələ bilmir və bərpa prosesi zəifləyir. Bayramdan sonra iş günləri başladıqda isə bir çox insan səhər oyanmaqda çətinlik çəkir, gün ərzində tez yorulur və diqqətini toplamaqda çətinlik yaşayır.

İş rejiminə necə qayıtmalı?

Mütəxəssislər bildirirlər ki, yuxu rejimini birdən-birə dəyişmək bədən üçün əlavə stress yarada bilər. Buna görə də oyanma vaxtını mərhələli şəkildə erkənə çəkmək tövsiyə olunur. Məsələn, hər gün 15–20 dəqiqə daha tez oyanmaq bədənin yeni rejimə daha asan uyğunlaşmasına kömək edir.

Yatmazdan əvvəl elektron cihazlardan istifadəni məhdudlaşdırmaq da vacibdir. Telefon, planşet və televizor kimi mavi işıq yayan cihazlar melatonin hormonunun ifrazını azaldaraq yuxuya getmə prosesini gecikdirir.

Səhər oyanan kimi pərdələri açmaq və otağa gün işığının daxil olmasını təmin etmək isə bədənin “oyanma siqnalını” almasına kömək edir. Gün işığı bioloji saatın yenidən tənzimlənməsində mühüm rol oynayır.

Yaz aylarında halsızlıq niyə artır?

Fəsil dəyişdikdə orqanizmdə müəyyən adaptasiya prosesi gedir. Bu dövrdə maddələr mübadiləsi və hormonal balans dəyişə bilər ki, bu da bir çox insanda yorğunluq və enerji çatışmazlığı hissi yaradır.

Əgər əllər və ayaqlar həmişəkindən daha soyuq olursa, bu, qan dövranının bir qədər zəifləməsi və ya enerji balansının pozulması ilə əlaqəli ola bilər.

Mütəxəssislər bu dövrdə maqneziumla zəngin qidaların qəbulunu artırmağı tövsiyə edirlər. Çərəzlər, badam, fındıq və tünd şokolad kimi məhsullar sinir sisteminin fəaliyyətini dəstəkləyir və enerji səviyyəsini yüksəldə bilər.

Bundan əlavə, gün ərzində qısa gəzintilər etmək, yüngül fiziki aktivliklə məşğul olmaq və kifayət qədər su qəbul etmək də orqanizmin daha gümrah qalmasına kömək edir.

Həkimlər qeyd edirlər ki, düzgün yuxu rejimi, balanslı qidalanma və aktiv həyat tərzi bayramdan sonra bədənin bioloji ritmini daha tez bərpa etməyə imkan verir.

Nilufər