Təəccübləndirən ARAŞDIRMA: Süd verən qadınlarda kökəlmə riski daha az olurmuş

Oslo Universitetinin yeni araşdırması ana südü ilə qidalandırmanın qadınların çəkisinə uzunmüddətli təsir göstərə biləcəyini ortaya qoyub.

News24.az xəbər verir ki, tədqiqatın nəticələrinə əsasən, körpəsinə ən azı üç ay ana südü verən qadınlar bunu etməyən analarla müqayisədə həyat boyu orta hesabla 6,5 kiloqrama qədər daha az çəki yığırlar.

Alimlər Norveçdə 170 mindən çox qadının iştirak etdiyi “Qadınlar və Sağlamlıq Araşdırması”nın məlumatlarını təhlil ediblər.

Ən nəzərəçarpan çəki fərqi hamiləlikdən əvvəl artıq çəkisi olan və ya piylənmə diaqnozu qoyulan qadınlar arasında müşahidə edilib. Bu qrupda 3–15 ay ərzində övladını ana südü ilə qidalandıran qadınlar, digər analarla müqayisədə gənclikdən orta yaşa qədər orta hesabla 6,5 kiloqram daha az çəki artımı ilə qarşılaşıblar.

Araşdırmada qeyd olunub ki, ana südü ilə qidalandırma enerji sərfini artıraraq çəki nəzarətinə müsbət təsir göstərə bilər. Bununla yanaşı bəzi qadınlarda iştahanın artması kimi fərqli reaksiyalar da müşahidə oluna bilər.

Alimlərin tövsiyəsinə görə, körpələrin ən azı bir il ana südü ilə qidalandırılması məqsədəuyğundur.

Tədqiqat xüsusilə artıq çəkisi olan və ya piylənmədən əziyyət çəkən qadınlar üçün ana südü ilə qidalandırmanın dəstəklənməsinin uzunmüddətli sağlamlıq baxımından əhəmiyyətini vurğulayır.