Yuxu üçün ən doğru pozisiya hansıdır? – Həkimdən açıqlama

Yuxu zamanı hansı pozisiyanın daha faydalı olması ilə bağlı müxtəlif fikirlər var. Həkimlərin sözlərinə görə, hər kəs üçün ideal yuxu pozisiyası mövcud deyil.

News24.az xəbər verir ki, britaniyalı həkim Niş Manekin sözlərinə görə, sol böyrü üstə yatmaq mədə turşusunun qida borusuna geri qayıtmasını, yəni reflüksü azaltmağa kömək edə bilər. Buna görə mədə yanması və reflüksdən əziyyət çəkənlər üçün bu pozisiya daha uyğun hesab olunur, lakin bunun həzmi avtomatik olaraq yaxşılaşdırdığına dair əsaslı sübut yoxdur.

Arxası üstə yatmaq bədən çəkisinin daha bərabər paylanmasına və düzgün yastıq seçildikdə onurğanın təbii vəziyyətdə qalmasına kömək edə bilər. Ancaq xoruldama və yuxu apnesindən əziyyət çəkənlərdə bu vəziyyət problemi ağırlaşdıra bilər.

Böyrü üstə yatmaq isə tənəffüs yollarının daha açıq qalmasına kömək etdiyi üçün xoruldama və yuxu apnesi zamanı faydalı ola bilər. Bel və ya çanaq ağrısı olanlara dizlərinin arasına yastıq qoymaq tövsiyə edilir.

Hamilə qadınlara da adətən sol böyrü üstə yatmaq məsləhət görülür. Bununla belə, sağ böyrü üstə yatmaq da, narahatlıq yaratmadığı halda, ümumiyyətlə məqbul sayılır.

Mütəxəssislər bildirirlər ki, ən yaxşı yuxu pozisiyası insanın özünü rahat hiss etdiyi, bədəni düzgün dəstəkləyən və keyfiyyətli yuxuya imkan verən vəziyyətdir.