Xəzərin sahili tullantılardan təmizləndi - FOTO/VİDEO

Ekologiya və Təbii Sərvətlər, Gənclər və İdman Nazirliklərinin təşkilatçılığı, “Təmiz Şəhər” ASC-nin, idman federasiyalarının nümayəndələrinin, ekokönüllülərin iştirakı ilə bu gün Xəzər dənizinin Zirə qəsəbəsi sahilində, eyni zamanda şimaldan cənuba doğru bütün sahilboyu ərazilərdə təmizlik aksiyaları keçirilib.

News24.az xəbər verir ki, aksiyalar zamanı sahil zolağı plastik və digər tullantılarından təmizlənib.

Təmizlik aksiyasının keçirilməsində məqsəd dəniz sahillərində təmizliyə riayət olunmasını təbliğ etmək, sahilyanı ərazilərin məişət tullantıları ilə zibillənməsinin qarşısını almaq və ictimaiyyəti  ətraf mühitinin mühafizəsi sahəsində mübarizəyə cəlb etməkdir.

Ekologiya və təbii sərvətlər naziri Muxtar Babayev çıxışında bildirib ki, hər bir vətəndaş təbiəti qorumalıdır: " Hər bir vətəndaş Xəzər sahilinə, çay kənarına gəlirsə, düşünməlidir ki, ondan sonra da kimsə həmin məkana üz tutacaq. Bələdiyyələr, icra orqanları sahilyanı əraziləri təmiz saxlamağa çalışırlar. Lakin vətəndaşların da dəstəyi önəmlidir. İnanırıq ki, vətəndaşlar Xəzər sahillərində istirahət etməyə gələndə öz tullantılarını ərazidə qoyub getməyəcək, özləri ilə götürüb aparacaqlar".

Gənclər və idman naziri Fərid Qayıbov çıxışında bildirib ki, bu kimi aksiyaların keçirilməsi gənclərin də maariflənməsi üçün vacibdir: " Şəhərimizi, vətənimizi ilk növbədə özümüz üçün təmiz saxlamalıyıq. Hər bir kəsi bu aksiyanı davam etdirməyə çağırıram. Təkcə nazirlik tərəfindən deyil, maarifləndirmə işləri hər kəs tərəfindən aparılmalıdır. Ekologiyanı qorumaq hər kəsin borcudur".

Bu məqsədlə tədbirə dəvət olunan idmançılar aksiyaya diqqət çəkmək, Xəzərin sahilini qorumaq, ekoloji sağlamlığı qorumaq məqsədilə əhaliyə çağırış edib. Aksiyada iştirak edən Azərbaycan paracüdoçusu İlham Zəkiyevin sözlərinə görə, bütün idman ictimaiyyəti bu aksiyaya qoşulub: "Ətrafı təmiz saxlamaq hər kəsin borcudur, gələcək nəsillərə təmiz gələcək qoymalıyıq. Ümid edirik ki, keçirilən aksiya nəticəsiz qalmayacaq. Vətəndaşlar istirahət etdikdən sonra tullantıları torbalara yığıb zibil qutularına atsalar, bu cür aksiyaların keçirilməsinə ehtiyac qalmaz".

Aksiyadan sonra iştirakçılar Abşeron Milli Parkını ziyarət ediblər.

Qumral ƏLİYEVA
FOTO: Teymur MƏMMƏDOV
Video: Nicat NİFTƏLİYEV