Ürəyi dözməyən məşhurlar — SİYAHI

Qəfil ürək tutmasından vəfat etdi... Mətbuatda ölüm xəbərlərini oxuyanda tez-tez bu səbəblə rastlaşırıq. Son zamanlar qəfil ürək tutmasından ölümünə sarsıldığımız bir çox tanınmış simalar da az deyil. Təəssüf ki, vəfat edən tanınmışların əksəriyyəti gənc yaşlarında həyatla vidalaşıb. Bir neçə gün öncə isə 2 gənc mətbuat nümayəndəsi eyni səbəbdən vəfat etdi. 

News24.az son bir neçə ayda ürək tutmasından vəfat edən tanınmışları xatırladır: 

Hacı Şahin Həsənli

Onun qəfil ölümünü eşidəndə heç kim inanmaq istəmədi. 42 yaşlı İlahiyyatçı Hacı Şahin Həsənlinin qəfil ölümü sevənlərini dərindən üzdü. Təəssüf ki, gənc ilahiyyatçının ölümündən bir neçə gün sonra ürək tutmasından vəfat etdiyi məlum oldu. 

Oqtay Əliyev

Hacı Şahindən 20 gün sonra isə Azərbaycanın əməkdar mədəniyyət işçisi, tanınmış televiziya prodüseri, rejissoru Oqtay Əliyev də ürək tutmasının qurbanı oldu. O, sükan arxasında olarkən məhz ürək tutması səbəbindən idarəetməni itirərək qəza törədib. Hadisə nəticəsində Oqtay Əliyev vəfat edib, avtomobildə olan Xalq artisti Mehriban Zəki yaralanıb, əməkdar artist, tanınmış aktrisa Dilarə Əliyeva isə yüngül xəsarətlər alıb.

İranə Tağızadə

Xalq artisti, Əməkdar incəsənət xadimi, Azərbaycan Dövlət Akademik Rus Dram Teatrının rejissoru İranə Tağızadə də onu haqlayan qəfil ürək tutmasından vəfat edib.

Kərəm Məmmədov

Ürək tutmasından vəfat edən daha bir məşhur sima da Kərəm Məmmədov oldu. Bakı Dövlət Universitetinin (BDU) Tarix fakültəsinin  Arxeologiya və etnoqrafiya kafedrasının müdiri, tarix üzrə fəlsəfə doktoru, dosent Kərəm Məmmədov iyun ayının 10-da həyatla ilə vidalaşdı. 

Tural Qasımov

Bir neçə gün öncə isə operator Tural Qasımovu gənc yaşda ürək tutması səbəbindən itirdik.

Zülfüqar Hüseynzadə 

“Moderator” saytının rəhbəri, jurnalist Zülfüqar Hüseynzadənin isə 2 gün öncə qəfil halı pisləşib. Az sonra ürək tutması 52 yaşlı jurnalistin də həyatını yarıda qoydu.

Qumral ƏLİYEVA